Xitoydagi maktablardan birida sport zali shiftining qulab tushishi oqibatida to‘qqiz kishi halok bo‘ldi, yana ikki kishi vayronalar ostida qolmoqda, deb xabar berdi Sinxua.
Hodisa vaqtida sport zalida 19 kishi bo‘lgan, ulardan to‘rt nafari tashqariga qochib chiqa olgan, 15 nafari vayronalar ostida qolgan.
24-iyul ertalabki holatga ko‘ra vayronalar ostidan 13 kishi olib chiqildi, ulardan uch nafari o‘lik edi, olti nafari tibbiy yordamdan so‘ng vafot etdi.
Xitoyning Xeylunszyan provinsiyasida joylashgan Sitsikar shahridagi maktab shifti 23-iyul kuni qulab tushgan. Hodisa sabablari hozircha noma’lum, biroq dastlabki surishtiruv ishlari natijasida quruvchilar qurilish vaqtida maktab tomiga noqonuniy ravishda perlit yotqizgani, u yog‘ingarchilik taʼsirida suvni shimib, shishib ketgani, oqibatda tom qulagani aniqlandi. Qurilish kompaniyasi rahbarlari politsiya tomonidan hibsga olindi.
Avvalroq Xitoyda erkak bolalar bog‘chasiga hujum qilib, olti kishini o‘ldirgani haqida xabar berilgandi.
Eslatib o‘tamiz, 2021-yilda Xitoy janubidagi Guansi-Chjuan avtonom tumanidagi bolalar bog‘chasiga bir erkak pichoq bilan hujum qilgandi. Oqibatda 18 kishi jarohatlangan — 16 bola va ikki o‘qituvchi.
Izoh (0)