Turkiya qurolli kuchlari may oyi davomida ittifoqchi xorijiy kuchlar bilan hamkorlikda 3 ta yirik harbiy mashg‘ulotlar o‘tkazadi. Bu haqda Anadolu nashri xabar berdi.
Harbiy mashg‘ulotlar “Anatoliya qaqnusi”, “Dengiz bo‘risi-2” va “EFES” deb nomlangan. Ular mamlakatning turli qismlarida o‘tkazilishi bildirilgan.
“Anatoliya qaqnusi” mashqlari 6–17-may kunlari o‘tkazilishi belgilangan. “Dengiz bo‘risi-2” va “EFES” amaliyotlari esa 7–18-may kunlariga rejalashtirilgan.
Manbada aytilishicha, “Anatoliya qaqnusi” mashqlarida Ozarbayjon, Qatar, Polsha, Ruminiya, Saudiya Arabistoni va mezbon Turkiya harbiylari ishtirok etadi. Mashqlar Ko‘niyadagi uchinchi markaziy havo kuchlari bazasida o‘tkazilishi belgilangan.
Turkiyaning Marmaris harbiy zonasida esa dengiz floti, havo kuchlari va qirg‘oq qo‘riqlash kuchlarining brigadalaridan tarkib topgan 15 ming nafardan ortiq xodim ishtirokida “Dengiz bo‘risi-2” keng ko‘lamli harbiy mashg‘ulotlari o‘tkazilishi aytilgan.
2024-yilgi “EFES” harbiy mashqlari esa Turkiya uchun bahsli bo‘lgan Egey dengizi bo‘yida o‘tkazilishi belgilangan. Uning dasturi asosan jonli otishma dala mashg‘ulotlarini o‘z ichiga oladi.
Harbiy mashg‘ulotlar ko‘plab davlatlar ishtirokida qo‘shma harbiy salohiyat va tayyorgarlik darajasini oshirishga qaratilgan. Ushbu uchlik amaliyotlarda 49 mamlakat vakillari qamrab olinishi aytilgan.
Izoh (0)