Amerika va Filippin kuchlari 22-aprel kuni Janubiy Xitoy dengizida o‘zlarining so‘nggi yillardagi eng yirik jangovar mashg‘ulotlarini boshladi. Bu haqda US News nashri xabar berdi.
Manbada aytilishicha, mashg‘ulotlar 10-mayga qadar davom etadi. Ularda AQSH va Filippinning 16000 dan ortiq harbiy xizmatchilari hamda 250 nafar atrofida fransuz va avstraliyalik harbiylar va texnikalar ishtirok etadi.
Filippin harbiylari mashg‘ulotlarni “Balikatan” (tagalog tilida yelkama-yelka) deb nomlagan. Harbiy mashg‘ulotning asosiy mojaro ssenariysi Xitoy va Filippin qirg‘oqlarini yuvib turuvchi bahsli Janubiy Xitoy dengizida sodir bo‘ladi.
Filippin harbiylarining aytishicha, bu yilgi mashg‘ulotlarning asosiy yo‘nalishi hududiy mudofaadir. Mamlakat o‘z qonuniy hududlarida mudofaa mashqlari olib boradi.
Xitoy va Filippin o‘rtasidagi kelishmovchiliklar kuchayib borar ekan, Prezident Jo Bayden va uning maʼmuriyati agarda Filippinga hujum qilinsa, Amerika Qo‘shma Shtatlari Osiyodagi ittifoqchilaridan biri bo‘lgan Filippinni himoya qilishga majbur bo‘lishi haqida bir necha bor ogohlantirgan.
Xitoy Tashqi ishlar vazirligi matbuot kotibi Lin Jian harbiy mashg‘ulotlar hamda ittifoqchilar harbiy texnikasi Xitoy hududiga yaqin kelganidan xavotirda ekanligini bildirgan.
“AQSHning bu harakati mintaqadagi keskinlikni kuchaytiradi va noto‘g‘ri qaror qabul qilish xavfini oshiradi. Filippin o‘zining xavfsizlik borasidagi manfaatlari uchun AQSH qo‘g‘irchog‘i bo‘layotganini yana bir bor o‘ylab ko‘rishi va noto‘g‘ri yo‘ldan yurishni bas qilishi kerak”, — degan Xitoy vakili.
Izoh (0)