Turkiya qurolli kuchlari 3-may kuni Iroq shimolidagi harbiy operatsiya paytida 32 nafar kurd jangarisini yo‘q qilgan. Bu haqda Anadolu nashri xabar berdi.
Manbada aytilishicha, aksilterror operatsiya Iroq shimolidagi Haftanin, Gara, Hakurk hududlarida amalga oshirilgan. Maxsus operatsiya zonasiga kirib kelgan terrorchilarga jiddiy zarbalar berilgan.
32 nafar jangari yo‘q qilingani haqidagi maʼlumotni Turkiya Milliy mudofaa vazirligi tasdiqlagan. Ayni damda turk harbiy kontingenti joylashgan hudud atrofida vaziyat barqaror ekanligini maʼlum qilingan.
“Terrorga qarshi operatsiya mintaqadagi so‘nggi jangari yo‘q qilinmaguncha davom etadi. Terrorchi tashkilotlarning kuchayishiga yo‘l qo‘ymaymiz. Kurashimiz qatʼiyat bilan davom ettiriladi”, — deyiladi vazirlik xabarida.
Rasmiylar yo‘q qilingan terrorchilar Kurdiston ishchi partiyasiga aloqador ekanligini aytgan. Ular Turkiyaning chegara hududlari va harbiy obyektlarida hujumlar tashkil etishni rejalashtirgani ma'lum qilingan.
Maʼlumot o‘rnida, Kurdiston ishchi partiyasi 40 yildan ortiq vaqtdan beri Turkiya va Yaqin Sharq hududida terrorchilik hujumlari tashkil etib keladi. Partiya rasman Turkiya, AQSH va Yevropa Ittifoqi tomonidan terrorchi tashkilotlar ro‘yxatiga kiritilgan. Partiya uyushtirgan teraktlar oqibatida umumiy 40 ming nafardan ortiq odam, jumladan, ayollar, bolalar va go‘daklar halok bo‘lgani xabar qilinadi.
Izoh (0)