Ispaniyalik aktrisa va model Penelopa Kruz Sanches aprel oyida 50 yoshga to‘ldi. Minglab erkaklarni aqldan ozdirgan va o‘zining go‘zalligi bilan hayratga solgan ayol karyerasini 90-yillarda boshlagan.
Hozirda Penelopaning filmografiyasida 80 dan ortiq filmlar bor, ularda Gollivud yulduzi turli xil qahramonlarni qanchalik mohirlik bilan ijro etganini ko‘rish mumkin. Kruzning ota-onasi kino sanoatidan uzoq edi: onasi Enkarna shaxsiy sartaroshxonani boshqargan va uch farzandni tarbiyalagan, otasi Eduardo esa tadbirkor bo‘lgan.
Penelopa 14 yoshida mustaqil ravishda rejissyorga qo‘ng‘iroq qilgan (telefon kitobidan raqamini topib olgan) va unga aktrisa bo‘lish niyati haqida gapirgan, keyin esa unikiga mehmonga borgan. Shundan so‘ng qiz turli kastinglarda qatnasha boshlaydi, keyinchalik unga “La Quinta Marcha” shousiga boshlovchi bo‘lish taklif qilinadi.
Bolaligimda o‘taketgan ekstrovert edim... Kechki maktabda o‘qiganman, baletga qatnashardim, kastinglardan qolmasdim. O‘zimga agent qidirganimda ular meni uch marta rad etishdi, chunki kichkina qiz edim, lekin men taslim bo‘lishni xohlamasdim.
Penelopaning karyerasi 2001-yilda gullab-yashnaydi. Shundan keyin u “Gotika”, “Bulutga yetgan bosh”, “Noel”, “Bezori qizlar”, “Karib dengizi qaroqchilari: noma’lum qirg‘oqlarda” filmlarida rol ijro etadi. Aktrisa Vudi Allenning “Vikki Kristina Barselona” melodramasidagi roli uchun 2009-yilda “Ikkinchi plandagi eng yaxshi aktrisa” nominatsiyasida “Oskar” mukofotiga sazovor bo‘ladi.
2010-yilda aktrisa o‘zidan besh yosh katta bo‘lgan ispaniyalik aktyor va atrof-muhit faoli Xavyer Bardemga turmushga chiqadi.
Penelopa Kruz va Xavyer Bardem munosabatlari
1992-yilda ular suratga olish maydonchasida tanishgan. O‘sha paytda Penelopa 16 yoshda, Xavyer 21 yoshda edi. Shundan so‘ng ular o‘rtasida muhabbat paydo bo‘ladi.
Ammo suratga olish ishlaridan keyin ularning yo‘llari ayro tushadi, 2007-yilgacha bir-birlarini ko‘rishmaydi. Bu davrda Penelopa Tom Kruz, Mettyu Makkonahi, Nikolas Keyj va Mett Deymon bilan munosabat o‘rnatishga harakat qiladi. Ammo hech bir munosabat nikohgacha bormaydi — turli diniy e’tiqodlar, spirtli ichimliklarni suiiste’mol qilish va xiyonatlar Kruzni munosabatlarga chek qo‘yishga majbur qiladi.
Aytgancha, Xavyer ham o‘sha paytda band edi, lekin Kruz bilan ikkinchi uchrashuvdan biroz oldin u ham sevgilisi bilan ajrashadi. Agar Vudi Allenning “Vikki Kristina Barselona” filmi bo‘lmaganida, juftlik yana birga rol o‘ynamagan, aktyorlar qayta ko‘rishmagan bo‘lardi.
Shu paytdan boshlab Kruz va Bardem uchrasha boshlaydi. Har safar ommaviy axborot vositalari ularni birga ko‘rganida, yulduzlar do‘st ekanini da’vo qiladi. Xavyer “Vikki Kristina Barselona” filmidagi eng yaxshi aktyor mukofotini olguncha va Kann kinofestivalida tantanali nutq so‘zlagunga qadar, sevishganlar uch yil davomida munosabatlarini ommadan yashiradi.
Keyin ular yashirin to‘y o‘tkazishadi — Bagamadagi do‘stlarining uyida bo‘lgan to‘yida Penelopa Jon Gallianoning dizaynerlik libosini kiygan, ammo marosimdan fotosuratlar yo‘q.
Penelopa Kruz va bolalar tarbiyasi
2011-yilda taniqli juftlik birinchi marta ota-ona bo‘ladi — ular Leonardo (Leo) ismli o‘g‘il ko‘radi. Bir necha yil o‘tgach, Luna Enchinas ismli qizi tug‘iladi. G‘amxo‘r ota-ona farzandlariga oddiy, beg‘am bolalikni berish uchun ularni kameralar va ommadan himoya qiladi.
Aktrisaning ta’kidlashicha, bolalari ijtimoiy tarmoqlardan foydalanmaydi — ularga 16 yoshgacha shaxsiy akkaunt ochish taqiqlangan.
O‘quv yili tugab, bolalar uchun yozgi ta’til boshlanishi bilan Penelopa ham ta’tilga chiqadi yoki rejissyorlarni hozirda ishlay olmasligi haqida oldindan ogohlantiradi. Bunday ta’tillarda yulduz bolalarida san’atga mehr uyg‘otadi, ularni oddiy narsalarda ham go‘zallikni ko‘rishga o‘rgatadi.
Penelopa Kruz: yoshligidagi va hozirgi fotoshopsiz fotosuratlari
Gollivud sohibjamoli 20 yoshida bo‘lgani kabi 50 yoshida ham xuddi shunday go‘zal. U mukammal qomat, silliq teri va ipakdek sochlari bilan faxrlanadi.
- Aktrisa Bikram yoga bilan shug‘ullanadi — mashqlar 40 daraja harorat va yuqori namlik bo‘lgan xonada o‘tkaziladi;
- Ko‘p suv ichadi va to‘g‘ri ovqatlanadi;
- Kremlar, niqoblar va gellar yordamida yuz terisini muntazam ravishda namlaydi. U kundalik hayotda kosmetikadan deyarli foydalanmaydi.
- Kruzning so‘zlariga ko‘ra, u plastik jarrohlik amaliyotiga qarshi emas, lekin hali jarroh xizmatidan foydalanishiga erta. Yulduz qarib qolishdan qo‘rqmaydi. Uning fikricha, go‘zallik har yili o‘ziga xos tarzda namoyon bo‘ladi. Bunda kiyim muhim rol o‘ynaydi — bu sizni bir necha o‘n yilga yoshroq qilishi mumkin yoki aksincha.
Penelopa oddiy kiyimlarni afzal ko‘radi: futbolka, jinsi shim, kardigan va krossovkalar, chunki u “Gollivud hashamati”dan charchagan.
Penelopa Kruz: hozirda bo‘yi va vazni
G‘arb manbalariga ko‘ra, Penelopaning bo‘yi taxminan 168 santimetr, vazni esa 60 kilogramm.
Izoh (0)