Amerikalik mashhur san’atkor Madonna Braziliyaning Rio-de-Janeyro shahrida 40 yillik faoliyatidagi eng katta auditoriya oldida konsert berdi. Shou 65 yoshli xonandaning musiqa sohasida ish boshlaganiga 40 yil to‘lishi munosabati bilan tashkil etildi.
Shuningdek, konsert Madonnaning dunyo bo‘ylab uyushtirgan “Celebration” nomli turnesi doirasida mutlaqo bepul o‘tkazildi. Uzunligi 4 kilometr bo‘lgan Kopakabana sohillarida bo‘lib o‘tgan konsertga 1,6 milliondan ortiq muxlis tashrif buyurdi.
Manbalarga ko‘ra, pop-yulduz muxlislari butun Braziliyadan, shuningdek, qo‘shni Argentinadan uzoq Fransiyagacha bo‘lgan boshqa mamlakatlardan kelgan.
Konsert bo‘lib o‘tgan kun — 4-may sanasida Kopakabana atrofidagi mehmonxonalarning 98 foizi to‘lgan va shahar aeroporti 1-maydan 6-maygacha 27 ta shahardan 170 ta qo‘shimcha reyslarni qabul qilgan. Butun Rio-de-Janeyro “Xush kelibsiz, malika!” yozuvi bilan xonandani katta hurmat ila qarshi olgan.
Konsert shousi ikki soat davom etdi. Rasmiylar ushbu tadbir shahar iqtisodiyotiga 60 million dollar daromad keltirishi mumkinligini taxmin qilmoqda.
Izoh (0)