Bahosi milliard dollar: Cartier brendining hamma orzu qiladigan 5 ta eng qimmat taqinchog‘i

Bu uzuklar, marjonlar va broshlar dunyodagi eng boy odamlarning kolleksiyasida saqlanadi — bu buyumlar bir vaqtlar ularning yaqinlari uchun sovg‘a bo‘lgan, hozirda esa Cartier uyining mulkiga aylangan.

Britaniya monarxi Edvard VII Lui-Fransua Kartyeni “qirollarning zargari va zargarlar qiroli” deb atagan. Kartye mashhur fransuz ustasi Adolf Pikardan ta’lim oladi — ustozi 1847-yilda nafaqaga chiqqanida, uning ustaxonasini sotib oladi va o‘z nomi bilan ataydi.

Kartyening birinchi mashhur mijozi — Parij malikasi Matilda Bonapart edi — undan keyin mahalliy aristokratiyadan katta buyurtmalar kela boshlaydi. Keyinchalik zargarlik uyi Lui-Fransua o‘g‘lining qo‘liga o‘tadi. XX asr boshlarida oila biznesi kengayishni boshlaydi: Cartier London va Nyu Yorkda ham ochiladi. Shu bilan birga, Edvard II brenddan 27 ta diadema buyurtma qiladi. Ikki yildan so‘ng, 1904-yilda brend Britaniya monarxlari uchun zargarlik buyumlarining rasmiy va asosiy yetkazib beruvchisiga aylanadi. Tez orada dunyodagi eng badavlat oilalar Rokfellerlardan tortib Vanderbiltlargacha uning mijozlari bo‘ladi.

60-yillarga kelib, inqiroz davrida brendning moliyaviy ahvoli yomonlashadi. 1964-yilda Kartiyening kenja nabirasi vafotidan so‘ng, Cartier investorlar tomonidan sotib olinadi. Keyin esa barcha mulk huquqi tadbirkor Iogann Rupertga o‘tkaziladi, bu esa qimmat brendni fuqarolar uchun qulayroq qilgan holda inqirozni yengib o‘tishga yordam berdi. Uning tashabbusi bilan Cartier kolleksiyasida nafaqat zargarlik buyumlari, balki ruchkalar, zajigalkalar va atirlar ham taqdim etilgan.

Soatlar zargarlik uyi dastlab ixtisoslashgan asosiy buyumlardan biri bo‘lib qolmoqda. Keyinchalik esa uzuklar, bilaguzuklar va marjonlar yaratilgan.

Sunrise Ruby uzugi — 30,38 million dollar

Hech bir yoqut bunchalik qimmatga baholanmagan. Sunrise Ruby uzugi 2025-yilda Jenevada Sotheby’s auksionida 30 million dollarga sotilgan. Og‘irligi 25,59 karat bo‘lgan, olmos bilan bezatilgan yoqut Cartier kolleksiyasida eng qimmatbaho tosh hisoblanadi — u Myanmada qazib olingan. Xaridorning kimligi oshkor qilinmagan.

Hutton-Mdivani jadeit marjoni — 27,4 million dollar

Bu marjon XVIII asrda o‘z davrining eng boy magnati Frenk Vulvortning kolleksiyasida edi. Ammo zargarlik buyumi Vulvortning nabirasi Barbara Hattonga meros qolgandagina mashhur bo‘ladi. Jadeitdan yasalgan 27 ta katta yashil munchoqlardan iborat marjon Barbaraga 1933-yilda shahzoda Aleksis Mdivaniga turmushga chiqayotganida sovg‘a qilingan.

Ikki yildan so‘ng er-xotin ajrashadi — shahzoda qizga pul evaziga uylangandi, shu sabab sevgi haqida gap bo‘lishi mumkin emasdi. Biroq ajrashgandan so‘ng marjon Mdivanining ixtiyorida qoladi va deyarli 50 yil davomida oila mulki sifatida saqlanadi. 2014-yilda Gonkongdagi Sotheby’s auksionida Hutton-Mdivani marjoni Cartier zargarlik uyiga 27,44 million dollarga sotiladi.

La Peregrina marjoni — 11,8 million dollar

Lui-Fransua Kartye ushbu marjonni Elizabet Teylor uchun yaratgan. Marvaridni XVI asrda Panama qirg‘oqlaridan afrikalik qul topib olgan, buning uchun u ozodlikka erishgan. Qimmatbaho tosh ispan qirollik oilasiga beriladi, u Meri Tyudorga yoqib qoladi. Bir muncha vaqt marvarid monarx tojini ham bezagan.

Peregrina 1969-yilda kimoshdi savdosida Richard Bartonga 37 000 dollarga sotiladi, u marjonni rafiqasi Elizabet Teylorga Sevishganlar kuniga sovg‘a sifatida hadya qiladi. Marvarid shunchalik katta ediki, u bezagidan tez-tez tushib ketardi — tosh Bukingem saroyining polidan yoki itning og‘zidan topib olingandan keyin ham Cartier marjoniga o‘rnatishga qaror qilinadi. Marjon 2011-yilda sotilgan.

Panthere bilaguzugi — 7 million dollar

Panthere Cartier tarixidagi eng qimmatbaho taqinchoq hisoblanadi. Uzoq vaqt davomida u Britaniya monarxi Edvard III ning rafiqasi Uollis Simpsonga tegishli edi. Jan Tussen tomonidan yaratilgan Panthere bilaguzugi zargarlik uyi kolleksiyasidagi eng mashhur va eng qimmatlaridan biriga aylanadi. Dizayner panteralarni yaxshi ko‘rardi va Lui-Fransua Kartyening so‘zlariga ko‘ra, o‘zi ham ularga o‘xshardi.

Cho‘zilgan poza, olmos va onikslarning porlashi, zumrad ko‘zlar — bunday taqinchoqni faqatgina orzu qilish mumkin edi. Bilaguzuk faqat ikki marta qo‘ldan qo‘lga o‘tadi. 1986-yilda Uollis Simpsonning vafotidan keyin u 1 million dollarga, 2010-yilda esa 7 mln dollarga sotilgan.

Belle Epoque Diamond Devant-De-Corsage broshi — 17,6 million dollar

Ushbu hashamatli brosh haqida ma’lumotlar ko‘p emas. Faqatgina 1912-yilda Anri Pikning Parij ustaxonasida tayyorlangani ma’lum. Markazdagi olmos nok shaklida va og‘irligi 34,08 karat, ostidagi oval olmosning og‘irligi esa 23,55 karat. Hozirda mazkur brosh shaxsiy kolleksiyada saqlanadi. U uzoq vaqt davomida Yelizaveta II da bo‘lgan degan fikr ham bor — marhum qirolicha brosh taqishni yaxshi ko‘rardi.