Bollivud yosh aktrisalarni afzal ko‘rishi ma’lum. Ilgari bosh roldagi aktrisa turmushga chiqsa, darhol hisobdan chiqarilardi. Agar aktrisa 30 yoshga kirsa, unga xolalar va onalar darajasidagi rollar berilgan. Bollivud aktrisalarining “yaroqlilik muddati” har doim aktyorlarnikidan bir necha baravar kam bo‘lgan.
Ammo bugungi kunda vaziyat asta-sekin o‘zgarmoqda va bir vaqtlar mashhur bo‘lgan qahramonlar shou-biznesga qaytmoqda. Minakshi Sheshadrining Hindistonga qaytishi bunga yorqin misoldir. 80-yillarning o‘rtalaridan 90-yillarning boshigacha Minakshi Bollivuddagi eng ko‘p maosh oluvchi aktrisa va raqqosalardan biri bo‘lgan. Hozir u 60 yoshda, filmlarda rol o‘ynash uchun eri va bolalarini AQSHda qoldirib, o‘zi Hindistonga keldi.
Menakshining o‘zi bu haqda shunday deydi: Men 28 yildan beri kinoda rol o‘ynaganim yo‘q. Bu o‘ttiz yilni ta’til deb hisoblang. Men allaqachon fitna nazariyalari aylana boshlaganini his qilyapman.
Odamlar mendan qayta-qayta ajrashdingmi, deb so‘rashyapti. Men har doim yopiq odam bo‘lganman, hatto turmushga chiqqanimda ham. Shuning uchun shaxsiy hayotimga begonalarning kirishiga yo‘l qo‘ymayman.
Ular nima deyishsa, deyaversin. Men kinoda 16 yil ishladim. Mening vatanimga qaytish qarorimni oilam qo‘llab-quvvatlamoqda. Farzandlarim va erim AQSHda yashayapti, men Hindistonga ko‘chib o‘tdim. Lekin vaqti-vaqti bilan ularni ko‘rgani Amerikaga borib turaman yoki ular bu yerga kelishadi. Hamisha bolalarim ulg‘ayib, mustaqil bo‘lishlari bilanoq Hindistonga qaytishimni orzu qilganman.
Hozir qizim 25 yoshda, o‘z ishi bor. O‘g‘lim esa kollejda o‘qiydi.
Bu kutilmagan qaror emasdi. Shou-biznesga, raqsga va aktyorlikka bo‘lgan muhabbatimni bolalarim har doim bilishardi. Amerikada raqsdan dars berdim va ko‘plab tadbirlarda qatnashdim. Hozir 60 yoshdaman va hammasini noldan boshlamoqchiman.
Hindistonga qaytgach, eski tanishlarim, rejissyorlar, prodyuserlar va aktyorlar oldiga ish izlab yugurmadim. Do‘stlarim menga agentlik bilan shartnoma tuzib, karyeramni boshqarishga ruxsat berishimni maslahat berishdi. Agentlik potensialimni qayerda ishlatishni hali ham yaxshi biladi: OTT, realiti-shoular, spektakllar yoki raqslar.
Ammo ko‘plab agentliklar meni bir sababga ko‘ra rad etishdi — menda ijtimoiy tarmoqlar yo‘q edi. Hozirda shartnoma tuzishning asosiy sharti ijtimoiy tarmoqlarda ko‘plab obunachilar bo‘lishi ekan. Shuning uchun o‘zimning onlayn mavjudligimni rivojlantirishga e’tibor qaratishga qaror qildim va Instagram’da akkaunt ochdim.
Bugun o‘tgan yillar aktrisalari uchun katta imkoniyatlar ochilmoqda. Qiziqarli kontent yaratilmoqda va OTT platformalari rivojlanmoqda. Ular shunchaki filmlarda rol o‘ynamaydi, brend yaratadi. Anushka Sharma prodyuser bo‘lganida, u birinchilardan bo‘ldi. Uning uzoqni ko‘ra olishi meni hayratda qoldirdi.
Menga yoqmaydigan yagona narsa bu — trollar. Ammo qo‘limizdan hech narsa kelmas ekan. Ular menga nimalarni yozishmadi-ya! Kinoga qaytishimni o‘rta yoshdagi inqiroz va shunga o‘xshash narsa deyishdi: Sen hech qachon Madhuri bo‘la olmaysan, deb yozishdi.
Ular yuzimni o‘zgartirishni maslahat berishdi — meni arvoh va ajinalarga o‘xshatishdi, meni kampir deb atashdi ... Lekin men faqat bir narsani bilaman — hammasi men haqimda emas, balki ular haqida. Ularning fikrlashlari haqida. Men bunday odamlardan uzoqlashaman. Agar boshqalarning fikriga ko‘ra yashasam, bu muammoga aylanadi.
Men o‘zimni yaxshi ko‘raman va qadrimni yetarlicha baholay olaman. Odamlar faqat ayollarni g‘iybat qilishadi, chunki ular bizdan ko‘p narsa kutishadi. Ish haqida gapiradigan bo‘lsak, yaqin olti oy ichida qandaydir qiziqarli loyihani imzolashim mumkinligini his qilyapman.
Izoh (0)