Gaiti poytaxti Port-o-Prens shahrining qariyb 90 foizi jinoyatchi guruhlar tomonidan nazorat qilinmoqda. Bu haqda Venesueladagi Rossiya elchixonasi vakili “TASS” nashriga maʼlum qildi.
Manbada aytilishicha, Gaiti politsiyasi hozirga qadar keng tarqalgan jinoiy guruh bilan kurash olib borishni uddalay olmagan. Shaharning muhim kvartallari bezori guruhlar qo‘liga o‘tgan.
“Poytaxtda va, umuman, mamlakatda vaziyat nihoyatda og‘ir. Mamlakat eng chuqur siyosiy, iqtisodiy va ijtimoiy inqirozni boshdan kechirmoqda. Davlat muassasalari va oddiy gaitiliklarning uylariga muntazam hujumlar bo‘lib turibdi. Shahar 80 dan ortiq to‘dalar nazoratida. Poytaxtning 90 foizida hukumat nazorati yo‘qolgan”, — deya xabar bergan Rossiya elchixonasi.
Gaitidagi xavfsizlik va gumanitar vaziyat 2021-yilda prezident Jovenel Moisening o‘ldirilishi ortidan yomonlashdi. O‘sha yil oxirida 2200 dan ortiq odamning hayotiga zomin bo‘lgan zilzila yuz berishi ortidan mavjud qaltis vaziyat yanada keskinlashgani xabar qilingan.
1-mart kuni Gaitida jinoyatchilikka qarshi kurashish uchun 1000 nafar politsiyachidan iborat Keniya tinchlikparvar kontingentini mamlakatga yuborish to‘g‘risida kelishuv imzolangan edi. Shundan so‘ng Gaitidagi ayrim jinoiy guruhlar bosh vazir Ariel Anri boshchiligidagi hukumatni ag‘darishni rejalashtirgani haqida xabarlar tarqalgan.
3-mart kuni Gaiti hukumati qurolli to‘dalar va huquq-tartibot idoralari o‘rtasidagi qarama-qarshilik tufayli butun Ouest departamentida favqulodda holat va komendantlik soati joriy etishga qaror qilgan. Poytaxt Port-o-Prensda favqulodda vaziyat bir oyga cho‘zilgan.
Izoh (0)