Nigeriya mahalliy aholisi 300 ga yaqin maktab o‘quvchisini o‘g‘irlagan jinoiy guruh 1 milliard naira (621 848 dollar) talab qilayotganini, talab bajarilmasa barcha bolalarni o‘ldirish bilan tahdid qilganini aytdi. Bu haqda CNN xabar berdi.
Ular menga 12-mart kuni yashirin raqamdan qo‘ng‘iroq qilib, o‘quvchilarni qaytarish evaziga 1 milliard naira talab qildi. Ular bolalar o‘g‘irlab ketilgan kundan boshlab uch hafta davomida kutishini, agar hukumat chora ko‘rmasa, hammasini o‘ldirishini aytishdi, — deydi Kuriga qishlog‘ida yashovchi Aminu Jibril.
Jinoyatchilar mazkur o‘g‘irlik orqali to‘da a’zolarini o‘ldirgan hukumatdan o‘ch olganini ham aytgan.
300 dan ortiq o‘quvchi 7-mart kuni erta tongda mototsiklda qurollangan guruhlar tomonidan o‘g‘irlab ketilgan edi. Ba’zi o‘quvchilar qo‘yib yuborilgan, ulardan 287 nafari jinoiy to‘da qo‘lida qolgan. Asirga olinganlarning 100 ga yaqini boshlang‘ich sinf, qolgani esa o‘rta maktab o‘quvchilari.
Nigeriya prezidenti Bola Tinubu xavfsizlik kuchlariga o‘tgan hafta shimoli-g‘arbiy Kaduna shtatidagi maktabdan o‘g‘irlab ketilgan 300 ga yaqin o‘quvchi va xodimlarni ozod qilish uchun to‘lov to‘lamaslikni buyurgan.
Tinubu xavfsizlik idoralariga o‘g‘irlaganlarni hech qanday to‘lovlarsiz ozod qilishni ta’minlashni buyurgan, — dedi 13-mart kuni mamlakat axborot vaziri Muhammad Idris jurnalistlarga.
Izoh (0)