Nyu-Yorkdagi Falastin tarafdorlari namoyishlarida politsiya 57 kishini hibsga oldi

Nyu-York politsiyasi falastinliklarni qo‘llab-quvvatlagan 57 nafar namoyishchini hibsga oldi, deya xabar berdi CNN.

Xususan, politsiya “Yangi maktab” xususiy universitetida 44 kishini qo‘lga oldi. Namoyishchilar yotoqxona kirish yo‘lini to‘sib qo‘yib, talabalarning o‘z xonalariga kirishiga to‘sqinlik qilishgan, deydi politsiya xodimlari.

“Biz ularga hududni tark etishlarini bir necha bor aytdik”, dedi Nyu-York politsiya departamenti vakili, xodimlar namoyishchilarni nima uchun hibsga olganini tushuntirib.

Nyu-York universitetida yana 13 kishi hibsga olingan. Ta’lim muassasasining xabar berishicha, politsiyaning ogohlantirishidan keyin 30 ga yaqin odam o‘zi tarqab ketgan.

Isroilning falastinliklarga qarshi harakatlaridan norozilik belgisi sifatida AQSHdagi universitetlarda namoyishlar davom etmoqda. 18-apreldan beri hibsga olinganlar soni 2 mingdan oshdi.

Kecha 2-may kuni AQSH prezidenti Jo Bayden murojaat bilan chiqib, namoyishlar tinch bo‘lishi kerakligini aytdi va Isroilni qo‘llab-quvvatlashini takrorladi.