Yevropa tiklanish va taraqqiyot banki (YTTB) bilan 4R156 Urganch—Xonqa—Hazorasp—Toshsoqa orqali—Amudaryo—A380 avtoyo‘li avtomobil yo‘lini sement-beton qoplamasi bilan rekonstruksiya qilish bo‘yicha bitim imzolandi. Bu haqda Iqtisodiyot va moliya vazirligi matbuot xizmati xabar berdi.
Qayd etilishicha, ta’mirlanadigan yo‘lning jami uzunligi 84 kilometrni tashkil etadi. YTTB rekonstruksiya qilish uchun 238 million dollargacha miqdorda suveren kredit ajratadi.
Bu strategik muhim yo‘l Urganchni Qozog‘istonga A380 yo‘li bilan bog‘lovchi transport tarmog‘ining bir qismi va Markaziy Osiyo mintaqaviy iqtisodiy hamkorligining 2-yo‘lagi hisoblanadi, — deyiladi YTTB tomonidan e’lon qilingan press-relizda.
Qurilish ishlari tugallangach, hozirgi bir qatorli 2-toifali yo‘l ikki qatorli 1-toifali avtomobil yo‘liga aylanadi. Shuningdek, bank mablag‘lari 4R156 yo‘li bo‘ylab yordamchi infratuzilmani modernizatsiya qilishga yordam beradi.
Shavkat Mirziyoyev 2023-yil mart o‘rtalarida Surxondaryoga borganida Boysun—Denov yo‘nalishidagi yo‘llar sifati bo‘yicha odamlardan tushayotgan e’tirozlarni inobatga olib, o‘zi avtomobil haydab ko‘rgandi. O‘shanda prezident Surxondaryo viloyati hokimiga ushbu yo‘llarni ta’mirlash bo‘yicha topshiriq bergan va oradan ko‘p o‘tmay ishlar boshlab yuborilgandi.
Ma’lumotlarga ko‘ra, Surxondaryo viloyatidagi 4R-105 Darband—Boysun—Elbayon avtomobil yo‘lining 5-70 kilometr qismini va 4R-100 Mang‘uzor—Jarqo‘rg‘on—Bandixon—Oltinsoy—Denov avtomobil yo‘lining 128–174 kilometr qismini (jami 111 kilometr) rekonstruksiya qilish loyihasi Osiyo taraqqiyot banki mablag‘lari hisobidan amalga oshiriladi.
Izoh (0)