O‘zbekistonda ichimlik suvini o‘z vaqtida to‘lamaganlik uchun penya hisoblash tartibi dasturchilar tomonidan ishlab chiqilmoqda. Bu haqda “O‘zsuvtaʼminot” AJ boshqarma boshlig‘i Abror Rayimqulov “Daryo”ga maʼlum qildi.
Abror Rayimqulovning aytishicha, Vazirlar Mahkamasining iyuldagi qaroriga muvofiq, aholi iste’molchilari uchun yangi billing dasturi joriy qilingani sababli penya hisoblash tartibi dasturchilar tomonidan ishlab chiqilmoqda.
“Hozirgi kunda jismoniy shaxslar uchun ichimlik suv billing dasturi “O‘ztelekom” AJ dasturchilari tomonidan ishlab chiqilmoqda, penya hisoblash funksiyasi qachon tayyor bo‘lishi haqida aniq muddat aytilmagan”, — dedi Abror Raimqulov.
Qoidaga ko‘ra, isteʼmolchilar ichimlik suvi taʼminoti va suv chiqarish xizmati uchun hisobga olish priborlari mavjud bo‘lganda oxirgi uch oyning o‘rtacha sarfi bo‘yicha hamda hisobga olish priborlari mavjud bo‘lmaganda oylik isteʼmol normasi bo‘yicha keyingi oy uchun har oyning 10-sanasiga qadar 100 foiz oldindan haq to‘lashni amalga oshirishlari lozim.
To‘lovning shartnomada belgilangandan kechiktirilgan har bir kuni uchun — yuridik shaxslar 0,4 foiz, jismoniy shaxslar esa 0,1 foiz penya to‘lashi ko‘rsatib o‘tilgan. Ammo bu ko‘rsatkich jami kechiktirilgan summaning 50 foizidan oshmasligi lozim.
Yuridik isteʼmolchilar tomonidan qarzdorlik qoida va shartnomada belgilangan muddatda to‘lanmagan taqdirda, penya hisoblash tartibi joriy qilingan bo‘lib, ushbu tartibni amalga oshirish 2023-yilning 1-mayidan boshlangan.
Izoh (0)