Туркия расмийлари мамлакат Жанубий Африканинг Исроилга қарши геноцид ишига қўшилишини маълум қилди. Бу ҳақда Anadolu нашри хабар берди.
Манбада айтилишича, Туркия ҳукумати Фаластин масаласини ҳозирги халқаро тартибнинг барқарорлигига таъсир қилиши мумкин бўлган мавзу деб ҳисоблашини айтган. Шу боисдан ҳам расмийлар халқаро судда Жанубий Африка билан битта позицияда бўлишни маъқул кўрган.
“Муҳтарам президентимиз томонидан даъвога қўшилиш тўғрисида қарор қабул қилингандан сўнг, расмий аризамизни топширамиз. Бугунга қадар қилганимиз каби, инсоният виждони ва қонунлар назарида қораланган Исроилнинг муносиб жавоб олишини таъминлаш учун ҳаракатларимизни қатъият билан давом эттирамиз”, — деган Туркия Буюк Миллат Мажлиси Адлия қўмитаси раиси Жунейд Юксел.
Туркия расмийси, шунингдек, Анқара Фаластин урушини халқаро тартибнинг бузилиши ҳамда глобал ҳалокатларга олиб келувчи омил сифатида кўришини билдирган. Исроилнинг босиб олинган Фаластин ҳудудларида олиб борган сиёсатини эса апартеид деб атаган.
Туркия расмийлари Исроил 1948 йилги Геноцид жиноятининг олдини олиш ва жазолаш тўғрисидаги конвенцияни қўпол равишда бузаётганини билдирган. Улар, шунингдек, халқаро ҳуқуқ ҳар қандай шароитда истисно ва имтиёзларсиз ҳамма учун тенг қўлланиши кераклигини таъкидлаган.
Туркия Ташқи ишлар вазирлиги расмийлари Исроил томонидан содир этилган геноцид, инсониятга қарши жиноятлар ва уруш жиноятлари фош этилишини ҳамда зудлик билан суд жараёни бошланишини кутаётганларини билдирган.
Мамлакат хорижий идораси раҳбари Хоқон Фидан ҳам Индонезия ташқи ишлар вазири Ретно Марсуди билан матбуот анжуманида Туркия Жанубий Африканинг Исроилга қарши геноцид ишига қўшилишини расман тасдиқлаган.
Изоҳ (0)