Toshkent shahrida kuchli taʼsir qiluvchi dori vositasini muomalaga kiritilishining oldi olindi, deb xabar beradi Bosh prokuratura huzuridagi departament.
Qayd etilishicha, departamentning Yakkasaroy tuman bo‘limi tomonidan tezkor tadbir o‘tkazilgan. Tadbirda “A.Sh.” MCHJga qarashli dorixona sotuvchisi G.L. hech qanday hujjatsiz jami 245 dona “Reduksin” nomli kuchli taʼsir qiluvchi dori vositasini fuqaro B.M.ga 5,9 million so‘mga sotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 186-3-moddasi (tarkibida kuchli taʼsir qiluvchi moddalar mavjud bo‘lgan dori vositalarini retsept bo‘yicha chakana realizatsiya qilish tartibini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, DXX tomonidan Tojikiston va Qirg‘izistondan olib kelingan narkotik moddalar to‘xtatib qolingan edi.
Izoh (0)