AQSH Senati Rossiyadan uran importini taqiqlovchi qonun loyihasini ma’qulladi. Bu haqda Kongress yuqori palatasining energetika va tabiiy resurslar qo‘mitasi bayonotiga tayanib, “RIA Novosti” xabar berdi.
Senatorlar bu tashabbusni bir ovozdan qo‘llab-quvvatlagan. Qonun loyihasi Qo‘shma Shtatlarga 2028-yilning yanvarigacha ushbu turdagi yoqilg‘ini sotib olishni davom ettirish huquqini beradi. Taqiq 2040-yilgacha joriy etilgan.
Hujjat imzolash uchun AQSH prezidenti Jo Baydenga yuborilishi kutilmoqda.
Rossiya Qo‘shma Shtatlarga uranning eng yirik yetkazib beruvchisi bo‘lib, mamlakatda ishlatiladigan yoqilg‘ining deyarli to‘rtdan bir qismini ta’minlaydi. Uran evaziga Moskva har yili taxminan 1 milliard dollar oladi.
2023-yil dekabrida Reuters agentligi Rossiya 2022-yilda uran yetkazib berish bo‘yicha uchinchi o‘rinda ekanini yozgan edi.
Joriy yilning mart oyida Rossiya uranining Yevropada narxi 2013-yildan beri eng yuqori darajaga ko‘tarilgan: har bir kilogramm uchun 1713 yevro. Fevral oyida Amerika statistika xizmati 2023-yilda Qo‘shma Shtatlar Rossiyadan 1,2 milliard dollarga uran sotib olgani haqida xabar bergan. Bu statistika tarixdagi rekord ko‘rsatkich hisoblanadi.
Avvalroq Bayden Qo‘shma Shtatlar yil boshidan buyon 90 kg boyitilgan uran ishlab chiqarganini ma’lum qilgandi.
Izoh (0)