Britan-shved farmatsevtika kompaniyasi AstraZeneca ilk bor koronavirusga qarshi vaksinasi o‘limga olib keladigan nojo‘ya ta’sirga egaligi, ya’ni tromb hosil qilishini tan oldi. Bu haqda The Telegraph xabar berdi.
Oksford universiteti bilan hamkorlikda ishlab chiqilgan vaksina bemorlarga jiddiy zarar yetkazgani yoki o‘limga olib kelgani sababli kompaniyaga qarshi jamoaviy da’vo qo‘zg‘atilgan. Jabrlanganlar va marhumlarning yaqinlari AstraZeneca kompaniyasidan 100 million funt sterlinggacha (124 million 733 ming dollar) tovon puli talab qilmoqda.
Jabrlanganlardan biri Jeymi Skott bo‘lib, u 2021-yilning aprel oyida vaksinani olganidan so‘ng tromb hosil bo‘lib, miyasiga qon quyilgan. Bu esa organning tuzatib bo‘lmaydigan shikastlanishiga olib kelgan.
“Vaksina juda kam hollarda trombotsitopeniya sindromi (TTS) bilan tromga olib kelishi mumkin. Buning sabablari noma’lum”, — deya The Telegraph kompaniyaning Skott advokatlari bilan yozishmalaridan parcha keltirgan. Bunday kasallik taxminan 20 foiz hollarda o‘limga olib keladi.
AstraZeneca vaksinasi bilan emlanganlarda tromb hosil bo‘lgani haqida xabarlar 2021-yilda boshlangan, ammo Yevropa regulyatori bunga dalil topmagan. Sudda kompaniya vaksina trombni keltirib chiqarishi, ammo kamdan-kam hollarda ekanini tan oldi.
O‘z navbatida, Frankfurtdagi Gyote universiteti professori Rolf Marshalek AstraZeneca vaksinasidan keyin tromb paydo bo‘lishini adenovirus vektorlari bilan bog‘liqligi ehtimolini aytdi. Vaksina adenovirusdan COVID’ning boshoq oqsilini inson tanasiga yetkazish uchun foydalanadi. Boshoq oqsili sog‘lom hujayraning sitozol suyuqligiga (koronavirus odatda oqsillarni ishlab chiqaradigan joy) emas, balki yadroga yo‘naltiriladi. Shundan so‘ng boshoq oqsilining qismlari parchalanadi va hujayra membranasiga bog‘lana olmaydigan, immunizatsiyaga olib keladigan mutatsiyalarni hosil qiladi. Natijada mutant versiyalar taxminan 100 000 kishidan birida trombni keltirib chiqaradi.
Financial Times nashri Marshalekning qarashlarini ilmiy hamjamiyat tomonidan muhokama qilinayotgan ko‘plab versiyalardan biri deb atadi.
Izoh (0)