Markaziy Afrika Respublikasi maxsus jinoiy sudi mamlakatning sobiq prezidenti Fransua Bozizeni hibsga olishga xalqaro order berdi. Bu haqda Associated Press xabar berdi.
Bozizening insoniyatga qarshi jinoyatlarga aloqadorligi tekshirilmoqda. Uning gvardiyasi 2009–2013-yillar oralig‘ida Bosembel shahridagi qamoqxona va harbiy o‘quv markazida ushbu jinoyatlarni sodir etgan bo‘lishi mumkin. Sud bayonotida aytilishicha, Bozizega qarshi uning “jinoiy javobgarligini” tasdiqlovchi “jiddiy va izchil dalillar” mavjud.
Maxsus jinoiy sud Markaziy Afrika Respublikasi va xalqaro sudyalardan iborat. Ularning vazifalariga 2003-yilda Bozize davlat to‘ntarishi natijasida hokimiyat tepasiga kelganidan beri MARda sodir etilgan harbiy jinoyatlar va insoniyatga qarshi jinoyatlarni tergov qilish va sudga tortish kiradi.
U “Seleka” musulmonlar guruhi tomonidan ag‘darilganiga qadar, ya’ni 2013-yilgacha prezident sifatida faoliyat yuritgan. 2023-yilning martigacha 77 yoshli sobiq prezident Chadda surgunda yashab, keyinchalik u yerdan Gvineya-Bisauga jo‘nab ketgan.
Izoh (0)