Yevropa Ittifoqi urush boshidanoq Ukrainaga yordam va’da qilgan va uni harbiy harakatlar tugaguniga qadar davom ettirish niyatida. Bu haqda Yevropa Ittifoqining tashqi ishlar va xavfsizlik siyosati bo‘yicha oliy vakili Josep Borrel ma’lum qildi.
Borrel urush boshlanishidan avval 2022-yil yanvarida Donbassga tashrif buyurgani va Ukraina bosh vaziri Denis Shmigal bilan uchrashganini esladi. Diplomatning so‘zlariga ko‘ra, Ukraina rasmiylari unga rus qo‘shinlari bosqiniga tayyorgarlik ko‘rayotganliklarini aytgan va Yevropa Ittifoqi nima qilmoqchi ekanini so‘ragan: Ukrainani taslim bo‘lishga chaqirish yoki zarur qurollarni yetkazib berish. Borrel o‘sha paytda bu savolga javob berolmaganini tan olgan, biroq janglar boshlangach, Yevroittifoq Kiyevni qo‘llab-quvvatlashini e’lon qildi.
Ukraina xalqini qo‘llab-quvvatlashda davom etishimiz kerak. Yevropaliklar Donbass uchun o‘lishga bormaydi, ammo ukrainlarga Donbass uchun o‘lishni to‘xtatishga yordam bera olamiz, — dedi Borrel.
Uning ta’kidlashicha, Yevropa Ittifoqi urush boshlanganda Ukrainaga yordam berishni va’da qilgan va u tugaguncha, garchi bu “tez orada amalga oshmasa ham” yordam beradi.
Izoh (0)