Европа Иттифоқи уруш бошиданоқ Украинага ёрдам ваъда қилган ва уни ҳарбий ҳаракатлар тугагунига қадар давом эттириш ниятида. Бу ҳақда Европа Иттифоқининг ташқи ишлар ва хавфсизлик сиёсати бўйича олий вакили Жосеп Боррель маълум қилди.
Боррель уруш бошланишидан аввал 2022 йил январида Донбассга ташриф буюргани ва Украина бош вазири Денис Шмигаль билан учрашганини эслади. Дипломатнинг сўзларига кўра, Украина расмийлари унга рус қўшинлари босқинига тайёргарлик кўраётганликларини айтган ва Европа Иттифоқи нима қилмоқчи эканини сўраган: Украинани таслим бўлишга чақириш ёки зарур қуролларни етказиб бериш. Боррель ўша пайтда бу саволга жавоб беролмаганини тан олган, бироқ жанглар бошлангач, Евроиттифоқ Киевни қўллаб-қувватлашини эълон қилди.
Украина халқини қўллаб-қувватлашда давом этишимиз керак. Европаликлар Донбасс учун ўлишга бормайди, аммо украинларга Донбасс учун ўлишни тўхтатишга ёрдам бера оламиз, — деди Боррель.
Унинг таъкидлашича, Европа Иттифоқи уруш бошланганда Украинага ёрдам беришни ваъда қилган ва у тугагунча, гарчи бу “тез орада амалга ошмаса ҳам” ёрдам беради.
Изоҳ (0)