Yevropa Ittifoqi diplomatiyasi rahbari Jozep Borrel Eron Qurolli kuchlarining elita bo‘linmasini terrorchilik tashkilotlari ro‘yxatiga kiritish hozircha imkonsizligini aytdi. Bu haqda tegishli manbalarga tayanib, “TASS” xabar berdi.
“Biz bir necha bor Islom inqilobi qo‘riqchilari korpusini terrorchilik tashkilotlari ro‘yxatiga qo‘shish masalasini muhokama qilganmiz. Biroq buning uchun a’zo davlatning sud organi tashkilot terrorchilik harakatini sodir etgan, deb hisoblashi kerak. Ayni paytda bunday emas”, — deydi Borrel.
Tehronga qarshi yangi sanksiyalar haqida gapirar ekan, diplomat buning uchun, birinchi navbatda, “sanksiya qilinishi mumkin bo‘lgan narsalar” kerakligini ta’kidlagan.
Avvalroq Yevrokomissiya rahbari Ursula fon der Lyayen Yevropa Ittifoqi so‘nggi voqealar munosabati bilan Eronga qarshi sanksiyalarni kengaytirish, xususan, Tehronning dron va raketalarni ishlab chiqarishiga qarshi sanksiyalarni ko‘rib chiqishini ma’lum qilgandi.
Eron armiyasi mamlakatning Suriyadagi konsulligi Isroil samolyotlari tomonidan yo‘q qilinishiga javoban 14-aprelga o‘tar kechasi Isroilga zarba berdi. Hujum, turli manbalarga ko‘ra, bir necha yuz raketalar va dronlar, jumladan, Shahed kamikadze dronlari, Fattoh va Fattoh-2 gipertovushli raketalari bilan amalga oshirilgan. Eron davlat telekanali Press TV barcha gipertovushli raketalar nishonga yetganini xabar qilgan.
Isroil armiyasi Eron 170 ga yaqin dron, 30 dan ortiq qanotli raketalar va 120 dan ortiq ballistik raketalarni uchirganini aytib, faqat bir nechta raketalar mamlakatgacha yetib kelganini va kichik zarar keltirganini ta’kidlagan.
Eron rasmiysi Isroil javob chorasini ko‘rsa, Eronning navbatdagi operatsiyasi avvalgisidan ko‘ra kattaroq bo‘lishi haqida ogohlantirgan.
Isroil vaziri Benni Gantsning aytishicha, mamlakat Eron tahdidiga qarshi mintaqaviy koalitsiya tuzish va hujumga tegishli vaqtda va mos tarzda javob berish niyatida.
Izoh (0)