Ukraina tomoni Yevropa Ittifoqidan yettita Patriot havo mudofaa tizimini so‘radi.
Bu haqda Yevropa Ittifoqining tashqi ishlar va xavfsizlik siyosati bo‘yicha vakili Jozep Borrel bugun, 9-aprel kuni Yevrokomissiyaning rasmiy videoportalida efirga uzatilgan matbuot anjumanida ma’lum qilgan.
“Biz Ukrainani qo‘llab-quvvatlashda davom etish uchun ma’naviy majburiyatimiz bor. Men yaqinda Dmitriy Kuleba (Ukraina tashqi ishlar vaziri) bilan gaplashdim. U mendan yettita Patriot tizimini so‘radi. G‘arb mamlakatlarida 100 ga yaqin Patriot bor, ammo biz haligacha ulardan yettitasini Ukrainaga ajrata olganimiz yo‘q”, — dedi Borrel.
Uning qayd etishicha, Yevropa davlatlari yaqin orada Patriot tizimini Kiyevga yetkazib berishi mumkin. Borrel Yevropa Ittifoqi tashqi ishlar va mudofaa vazirlarining navbatdagi yig‘ilishida Ukraina Qurolli kuchlarini havo hujumidan mudofaa tizimlari bilan ta’minlash masalasini muhokamaga qo‘yishni rejalashtirmoqda.
Izoh (0)