Россия Ғарбда музлатиб қўйилган активлар эвазига босиб олинган янги ҳудудларни қайтармайди. Бу ҳақда Россия ТИВ матбуот котиби Мария Захарова ўзининг Telegram каналида хабар қилди.
Ҳудуддаги активлар ўзгармайди. Биз ватанимиз устидан савдолашмаймиз, — дея таъкидлаган Захарова.
Унинг қўшимча қилишича, Россия активлари дахлсиз бўлиб қолиши керак.
The Wall Street Journal аввалроқ Германия Россия активлари мусодара қилинишини қўллаб-қувватлашдан бош тортаётгани ҳақида хабар берган эди. Унга кўра, Германия расмийлари ушбу активлардан Украинадаги можарога барҳам бериш ва Россиянинг ҳудудий имтиёзлари бўйича музокараларда восита сифатида фойдаланиш мумкин, деб ҳисоблайди.
WSJ’га кўра, Берлин Россия активларининг мусодара қилиниши Германияга қарши Иккинчи жаҳон уруши давридаги жиноятлар учун янги суд жараёнларини қўзғатиши мумкинлигидан хавотирда. Германия 1952 йилдан бери Холокост қурбонлари ва уларнинг оилаларига 90 миллиард доллардан ортиқ пул тўлаган.
Экспертлар Германия мамлакатда фаолиятини давом эттираётган немис компанияларини ҳимоя қилиш учун Россия активларини мусодара қилишдан бош тортаётганини тахмин қилган. Ҳозирда Россияда 272 немис компанияси мавжуд.
Аввалроқ Россия президенти матбуот котиби Дмитрий Песков Россия активларининг мусодара қилиниши жавоб чоралари ва суд жараёнларини келтириб чиқаришидан огоҳлантирган.
Изоҳ (0)