Muzlatilgan Rossiya aktivlarining Ukraina foydasiga musodara qilinishi Yevropani zaiflashtirishi mumkin. Bu haqda Fransiya prezidenti Emmanuel Makron Chexiya prezidenti Petr Pavel bilan uchrashuv yakunlari bo‘yicha matbuot anjumanida ma’lum qildi.
“Biz xalqaro huquqqa zid bo‘lgan harakatlarni qo‘llab-quvvatlamaymiz va bunday muhokamalarning boshlanishi, menimcha, bu aktivlar joylashgan Yevropani zaiflashtiradi”, — dedi Fransiya rahbari.
Makron barcha masalalarda qonun ustuvorligi himoya qilinishi kerakligini ta’kidladi.
4-mart kuni Euractiv manbalariga tayanib, Yevrokomissiya ikki hafta ichida muzlatilgan Rossiya aktivlaridan foydalanish bo‘yicha rasmiy ssenariyni taqdim etishi haqida xabar berdi.
Italiya bosh vaziri Jorja Meloni 3 mart kuni Ukrainaning Rossiya tomonidan muzlatilgan aktivlari hisobiga tiklanishini “falsafiy jihatdan to‘g‘ri” deb bilishini aytdi. Biroq u mazkur jarayondagi qonun bilan bog‘liq qiyinchiliklarni tan oldi.
Ukrainada harbiy harakatlar boshlanganidan keyin Rossiya Markaziy bankining taxminan 260 milliard yevro (282 milliard dollar) miqdoridagi aktivlari muzlatib qo‘yildi. Taxminan 191 milliard yevro (207 milliard dollar) Euroclear depozitari tomonidan muzlatilgan. 2023 yil oxirida muzlatilgan aktivlardan 4,4 milliard yevro daromad olindi.
Izoh (0)