Yevropa Ittifoqi 2022—2023-yillarda muzlatilgan Rossiya aktivlaridan olingan 5 milliard yevro foydani Ukrainaga o‘tkazmaydi. Bu haqda tegishli manbalarga tayanib, Politico xabar berdi.
Nashrga ko‘ra, pullar Bryusseldagi Euroclear qimmatli qog‘ozlar depozitariysida Moskva da’volaridan sug‘urta sifatida qoladi.
Rossiyaning muzlatilgan aktivlari bilan bog‘liq 2022—2023-yillardagi foyda “oddiy biznes” doirasida olingan foydadan ajratilgan. Biz bu foydani aksiyadorlarga taqsimlamaymiz va keyingi ko‘rsatmalarga qadar ushlab turamiz. Bu mablag‘lar Ukrainadagi urush tufayli markaziy qimmatli qog‘ozlar depozitariylari ko‘rgan xarajatlar, xavflar hamda yo‘qotishlarni qoplash uchun ishlatiladi, — deb tushuntirdi Euroclear.
Ukraina Adliya vaziri Denis Malyuska bu fikrga qo‘shilmaydi va sud ishlari bo‘yicha sug‘urta uchun 5 milliard yevro juda katta miqdor ekanligini ta’kidlagan. U, shuningdek, Euroclear Ukrainadagi urush tufayli atigi 34 million yevro to‘g‘ridan to‘g‘ri zarar ko‘rganini aytgan.
Yevrokomissiya rejalariga ko‘ra, Rossiyaning muzlatilgan mablag‘laridan 2024-yil 15-fevraldan keyin olingan daromadlar Ukrainaga o‘tkazilishi mumkin. Ular bu mablag‘ning 90 foizini Yevropa tinchlik jamg‘armasi orqali Kiyevga qurol sotib olishga, qolgan 10 foizini esa Ukrainani tiklashga ishlatmoqchi. Ushbu sxema Yevropa Ittifoqining barcha davlatlaridan bir ovozdan ma’qullanishi kerak, ammo Yevropa Ittifoqida hali yakuniy konsensusga erishilmagan.
Politico’ning Belgiya hukumatidagi manbasiga tayanib xabar berishicha, fevral oyi holatiga ko‘ra, Rossiya Belgiya qonunchiligi asosida faoliyat yurituvchi Euroclear kompaniyasiga qarshi Rossiya Markaziy bankining muzlatilgan mablag‘larini qaytarishni so‘rab 94 ta da’vo arizasi bilan chiqqan.
Izoh (0)