Robert Levandovski “Oltin to‘p”ni qo‘lga kiritmagani haqida gapirdi.
“2020 — 2021-yillar faoliyatimdagi eng yaxshi yillar bo‘lgan. Yaqinda bir do‘stim menga statistika yubordi: 85 o‘yinda 100 ta gol urgan ekanman. Albatta, qachondir “Oltin to‘p”ni qo‘lga kiritishni istardim.
Sovrinni yutmaganim aqldan ozganimni bildirmaydi. Lekin men o‘sha yillarda navbatim kelganini his qilganman.
2021-yilgi sovrin Messiga tegishli. 2020-yilgi “Oltin to‘p” kechroq bo‘lsa ham berilishi mumkinligi haqida mish-mishlar eshitgandim (o‘sha yili koronavirus davrida sovrin bekor qilingandi). O‘sha mavsum men uchun ajoyib bo‘lgan, eng yuqori darajamda edim, hamma narsani yutgandik.
4 yildan keyin bo‘lsa-da, 2020-yilgi “Oltin to‘p”ni olsam, albatta, xafa bo‘lmasdim. Bu — katta sharaf va men mukofotni qabul qilgan bo‘lardim”, — dedi “Barselona” hujumchisi Bild'ga bergan intervyusida.
2022-yil “Barselona” safiga kelib qo‘shilgan 35 yoshli polshalik hujumchi o‘tgan davr mobaynida 61 o‘yinda maydonga tushib, 36 bora raqiblar darvozasiga yo‘l topgan.
Izoh (0)