Роберт Левандовски коронавирус пандемияси сабаб берилмаган “Олтин тўп” уники бўлиши кераклигини айтди

Роберт Левандовски “Олтин тўп”ни қўлга киритмагани ҳақида гапирди.

“2020 — 2021 йиллар фаолиятимдаги энг яхши йиллар бўлган. Яқинда бир дўстим менга статистика юборди: 85 ўйинда 100 та гол урган эканман. Албатта, қачондир “Олтин тўп”ни қўлга киритишни истардим.

Совринни ютмаганим ақлдан озганимни билдирмайди. Лекин мен ўша йилларда навбатим келганини ҳис қилганман.

2021 йилги соврин Мессига тегишли. 2020 йилги “Олтин тўп” кечроқ бўлса ҳам берилиши мумкинлиги ҳақида миш-мишлар эшитгандим (ўша йили коронавирус даврида соврин бекор қилинганди). Ўша мавсум мен учун ажойиб бўлган, энг юқори даражамда эдим, ҳамма нарсани ютгандик.

4 йилдан кейин бўлса-да, 2020 йилги “Олтин тўп”ни олсам, албатта, хафа бўлмасдим. Бу — катта шараф ва мен мукофотни қабул қилган бўлардим”, — деди “Барселона” ҳужумчиси Bild'га берган интервьюсида.

2022 йил “Барселона” сафига келиб қўшилган 35 ёшли полшалик ҳужумчи ўтган давр мобайнида 61 ўйинда майдонга тушиб, 36 бора рақиблар дарвозасига йўл топган.