Buxoro viloyatida qadimiy tangani Istanbulga olib ketishga uringan fuqaro ushlandi, deb xabar bermoqda Madaniy meros agentligi axborot xizmati.
Unga ko‘ra, 2024-yilning 15-fevral kuni Buxoro xalqaro aeroportidan Istanbul shahriga uchib ketayotgan O‘zbekiston fuqarosi qadimiy tangani mamlakat hududidan olib chiqishga uringan. Yo‘lovchining qo‘l yuklari bojxona xodimlari tomonidan xolislar ishtirokida tekshirilganda “40 pora” qiymatdagi qizil metalldan zarb qilingan tanga borligi aniqlanib, ushlab qolingan.
Buxoro viloyat Madaniy meros boshqarmasi badiiy ekspertiza bo‘limi xodimlari tomonidan tanga badiiy ekspertizadan o‘tkazildi. O‘rganishlar davomida ma’lum bo‘ldiki, “40 pora” qiymatdagi qizil misdan zarb qilingan tanga Usmoniylar sulolasi sultoni Sulton Abdulmajid I hukmronligi davriga tegishli tanga bo‘lib, 1839-yilda Konstantinopolda zarb qilingan.
Tanganing old tomonida tanga zarb qilingan sana hamda “Mahmudxon bin Abdulhamid Muzaffarning g‘alabasi sharafli bo‘lsin” yozuvi tushirilgan.
Ma’lumot uchun, Vazirlar Mahkamasining 1999-yil 23-martdagi “Madaniy boyliklarning olib chiqilishi va olib kirilishi to‘g‘risida”gi nizomiga ko‘ra tangani Buxoro davlat muzeyi qo‘riqxonasiga topshirish tavsiya etildi.
Izoh (0)