Malayziyada ikkita harbiy vertolyot to‘qnashdi, 10 kishi halok bo‘ldi (video)

Malayziyada ikkita harbiy vertolyot havoda to‘qnashishi oqibatida 10 kishi halok bo‘ldi. Bu haqda The Star xabar berdi.

Hodisa Qirollik dengiz flotining 90 yilligiga bag‘ishlangan o‘quv mashg‘ulotlari davomida yuz bergan. Taxminlarga ko‘ra, AgustaWestland AW139 va Eurocopter Fennec to‘qnashib ketgan, bortda 10 kishi bo‘lgani taxmin qilinmoqda.  

Vertolyotlardan biri Lumut aviabazasi stadioniga kiraverishda, ikkinchisi esa aviabazadagi sport majmuasining suzish havzasiga quladi. Ekipaj a’zolarining barchasi vertolyotlar to‘qnashib ketishi oqibatida halok bo‘ldi, — deyiladi xabarda.

Hozirda hodisa sabablari va sharoitlarini aniqlash bo‘yicha surishtiruv ishlari olib borilmoqda.