Dunyo mamlakatlari 2023-yilda harbiy xarajatlar uchun rekord darajadagi 2,44 trillion dollar mablag‘ sarflagan. Bu haqda Stokgolm xalqaro tinchlik tadqiqot instituti hisobotiga asoslanib, Anadolu nashri xabar berdi.
Manbada aytilishicha, 2023-yilda dunyo miqyosida harbiy xarajatlar 2022-yilga taqqoslaganda yillik 6,8 foizga oshgan. Bu esa 2009-yildan beri eng keskin yillik ko‘tarilish hisoblanadi.
AQSH, Xitoy, Rossiya, Hindiston, Saudiya Arabistoni, Buyuk Britaniya, Germaniya, Ukraina, Fransiya va Yaponiya 2023-yilda harbiy byudjetga eng ko‘p mablag‘ sarflagan o‘ntalik mamlakatlaridan hisoblanadi. 2024-yilda ham ularning armiyaga tikadigan mablag‘i faol oshishi prognoz qilingan.
2023-yilda AQSHning harbiy sohaga ajratgan byudjetida 2,3 foiz o‘sish kuzatilib, jami 916 milliard dollarni tashkil etgan. 296 milliard dollarlik harbiy byudjet bilan Xitoy 6 foizlik o‘sish qayd etgan. Rossiyada esa bu yo‘nalishdagi byudjet mablag‘i 24 foizga oshib, 109 milliard dollarlik chegaraga yetgan.
2023-yilda Ukrainaning harbiy xarajatlari Rossiya harbiy xarajatlarining 59 foiziga yaqinini tashkil etgan. Shu bilan birga, Ukraina kamida 35 milliard dollar harbiy yordam olgan.
Qo‘shimcha qilinishicha, o‘tgan yilda NATOning 31 aʼzosi harbiy sohaga 1,34 trillion dollar sarflagan. Bu esa jahon harbiy xarajatlarining 55 foiziga tengdir. Ushbu yirik harbiy byudjetning 68 foizi AQSH hissasiga to‘g‘ri keladi.
Shuningdek, Yaqin Sharqda prognoz qilingan harbiy xarajatlar o‘tgan yili 9 foizga oshib, 200 milliard dollarni tashkil etgan. Bu so‘nggi o‘n yil ichida kuzatilgan eng yuqori yillik o‘sishdir.
Isroilning harbiy xarajatlari mintaqada Saudiya Arabistonidan keyin ikkinchi o‘rinni egallagan. 2023-yilda Tel-Aviv harbiy byudjeti 24 foizga o‘sib, 27,5 milliard dollarga yetgan. Turkiyaning harbiy xarajatlari esa 37 foizga oshib, 15,8 milliard dollarda to‘xtagani maʼlum qilingan.
Izoh (0)