Niderlandiyada 613 kun davomida koronavirus bilan kurashgan erkak vafot etdi, virus uning tanasida taxminan 50 marta mutatsiyaga uchragan. Bu haqda Bild xabar berdi.
Erkak 2022-yil fevral oyida omikron shtammi bilan kasallangan va Amsterdam universiteti tibbiyot markazida davolangan. U kasalxonaga yotishdan oldin bir necha marta infeksiyaga qarshi emlangan, ammo organizmida antitanachalar ishlab chiqarilmagan. Erkakni “Sotrovimab” preparati bilan davolashga harakat qilishgan, ammo virus atigi uch hafta ichida unga qarshilik ko‘rsatgan.
72 yoshli erkakda suyak iligining kasalligi bo‘lgan, bu uning qizil qon tanachalari va ildiz hujayralariga ta’sir ko‘rsatgan, keyinchalik unda leykemiya rivojlangan. Samarali davolanish uchun erkak immunitet tizimini bostiradigan immunodepressantlarni qabul qilgan, chunki uning tanasi tabiiy antitanachalar bilan koronavirusga qarshi kurasholmagan.
Bemor 2023-yilning kuzida vafot etgan. Ushbu holatni o‘rgangan olimlar buni dunyodagi eng uzoq davom etgan koronavirusga chalinish holati deb atagan. Ularning fikricha, bemorning mutatsiyaga uchragan virusi yuqumli bo‘lmagan.
Izoh (0)