Isroil harbiy razvedkasi rahbari 7-oktyabr kuni HAMAS yetakchiligida Isroilga qarshi uyushtirilgan hujumning oldini ololmaganlikda ayblanishi ortidan isteʼfoga chiqdi. Bu haqda Reuters nashri xabar berdi.
Harbiy razvedka rahbari, general-mayor Aharon Haliva 22-aprel kuni isteʼfoga chiqishini maʼlum qilgan. Oldinroq u mamlakat chegara mudofaasini tashkil etishdagi kamchiliklarini o‘z zimmasiga olib, xalqdan uzr so‘ragan edi.
General-mayor Aharon Haliva bilan birgalikda yana bir qancha yirik harbiy mutasaddilar Isroil tarixidagi eng halokatli hujumni oldindan ko‘ra olmagani va unga qarshi tura olmagani uchun ayblangan. Tegishli tashkilotlarga ularning faoliyatini tekshirish topshirilgan.
“Mening qo‘mondonligim ostidagi razvedka bo‘linmasi bizga ishonib topshirilgan vazifani bajara olmadi. Shundan beri men o‘sha qora kun haqidagi yukni o‘zim bilan olib yuribman”, — degan harbiy razvedka rahbari isteʼfosi oldidan yozgan maktubida.
Manbada aytilishicha, 7-oktyabrdagi hujum paytida HAMAS askarlari G‘azo atrofidagi yuqori texnologiyali xavfsizlik to‘siqlarini buzib o‘tib, Isroil kuchlarini hayratda qoldirgan. To‘siqdan o‘tilgach, Isroil aholi punktlari juda tez egallana boshlagan.
Hujumda 1200 nafarga yaqin isroillik va xorijlik halok bo‘lgan. Ularning aksariyati tinch aholi vakillari bo‘lgani aytilgan. 250 nafarga yaqin isroillik asirga olingan. Hozirda ulardan 133 nafari garovda qolmoqda.
Dastlab Isroil qurolli kuchlari boshlig‘i, general-leytenant Gerzi Halevi va ichki razvedka agentligi rahbari Shin Bet hujum uchun masʼuliyatni o‘z zimmasiga olgan. Ammo mamlakat urush holatida bo‘lgani bois Tel-Aviv ularni vazifasidan olishga shoshilmagan.
Izoh (0)