Дунё мамлакатлари 2023 йилда ҳарбий харажатлар учун рекорд даражадаги 2,44 триллион доллар маблағ сарфлаган. Бу ҳақда Стокгольм халқаро тинчлик тадқиқот институти ҳисоботига асосланиб, Anadolu нашри хабар берди.
Манбада айтилишича, 2023 йилда дунё миқёсида ҳарбий харажатлар 2022 йилга таққослаганда йиллик 6,8 фоизга ошган. Бу эса 2009 йилдан бери энг кескин йиллик кўтарилиш ҳисобланади.
АҚШ, Хитой, Россия, Ҳиндистон, Саудия Арабистони, Буюк Британия, Германия, Украина, Франция ва Япония 2023 йилда ҳарбий бюджетга энг кўп маблағ сарфлаган ўнталик мамлакатларидан ҳисобланади. 2024 йилда ҳам уларнинг армияга тикадиган маблағи фаол ошиши прогноз қилинган.
2023 йилда АҚШнинг ҳарбий соҳага ажратган бюджетида 2,3 фоиз ўсиш кузатилиб, жами 916 миллиард долларни ташкил этган. 296 миллиард долларлик ҳарбий бюджет билан Хитой 6 фоизлик ўсиш қайд этган. Россияда эса бу йўналишдаги бюджет маблағи 24 фоизга ошиб, 109 миллиард долларлик чегарага етган.
2023 йилда Украинанинг ҳарбий харажатлари Россия ҳарбий харажатларининг 59 фоизига яқинини ташкил этган. Шу билан бирга, Украина камида 35 миллиард доллар ҳарбий ёрдам олган.
Қўшимча қилинишича, ўтган йилда НАТОнинг 31 аъзоси ҳарбий соҳага 1,34 триллион доллар сарфлаган. Бу эса жаҳон ҳарбий харажатларининг 55 фоизига тенгдир. Ушбу йирик ҳарбий бюджетнинг 68 фоизи АҚШ ҳиссасига тўғри келади.
Шунингдек, Яқин Шарқда прогноз қилинган ҳарбий харажатлар ўтган йили 9 фоизга ошиб, 200 миллиард долларни ташкил этган. Бу сўнгги ўн йил ичида кузатилган энг юқори йиллик ўсишдир.
Исроилнинг ҳарбий харажатлари минтақада Саудия Арабистонидан кейин иккинчи ўринни эгаллаган. 2023 йилда Тель-Авив ҳарбий бюджети 24 фоизга ўсиб, 27,5 миллиард долларга етган. Туркиянинг ҳарбий харажатлари эса 37 фоизга ошиб, 15,8 миллиард долларда тўхтагани маълум қилинган.
Изоҳ (0)