AQSH prezidenti Jo Bayden 17-aprel kuni AQSH Kongressi palatasi spikeri Mayk Jonson tomonidan taklif etilgan Ukraina, Isroil va Tayvanga alohida yangi yordam qonunlarini qo‘llab-quvvatladi. Bu haqda Deutsche Welle xabar berdi.
Mazkur qonun Kiyevga yangi yordam paketi, xususan, qariyb 61 milliard dollar ajratish, Ukrainaga uzoq masofali ATACMS raketalarini topshirish, shuningdek, qarz tizimiga o‘tishni nazarda tutadi.
“Isroil va Ukrainani tanqidiy qo‘llab-quvvatlash, G‘azodagi falastinliklarga insonparvarlik yordami ko‘rsatish, Hind-Tinch okeani mintaqasida xavfsizlik va barqarorlikni mustahkamlashga qaratilgan qonun hujjatlari paketini qatʼiy qo‘llab-quvvatlayman”, — dedi Bayden Oq uyga bergan bayonotida.
Bayden Isroil Eron tomonidan misli ko‘rilmagan hujumlarga duch kelayotganini, Ukraina esa Rossiya tomonidan tinimsiz bombardimon qilinayotganini, so‘nggi bir oy ichida ularning intensivligi keskin oshganini eslatdi.
Baydenning fikricha, Vakillar palatasi qonun loyihalarini shu hafta qabul qilishi, Senat esa “tezda shunga amal qilishi kerak”.
“Men zudlik bilan ushbu qonunni imzolayman: biz do‘stlarimiz bilan birgamiz va Eron yoki Rossiyaning muvaffaqiyat qozonishiga yo‘l qo‘ymaymiz”, — dedi AQSH prezidenti.
Kiyevga yangi yordam 60,8 milliard dollarni tashkil etib, shundan 13,8 milliardi qurol va texnika sotib olishga, 13,4 milliardi Ukrainaga berilgan qurollarni almashtirish va ta’mirlashga yo‘naltiriladi. Ushbu mablag‘ning 23,2 milliard dollari Amerika qurollari zaxiralarini to‘ldirish uchun topshiriladi.
Isroilga yordam berish uchun 26 milliard dollar, Tayvanga esa 8 milliard dollar ajratish taklif qilinmoqda.
20-aprel kuni respublikachilar vakillar palatasida Ukraina, Isroil va Tayvanga yangi yordam ko‘rsatish bo‘yicha ovoz berish rejalashtirilgan. Har bir qonun loyihasi alohida ovozga qo‘yiladi.
Izoh (0)