АҚШ президенти Жо Байден 17 апрель куни АҚШ Конгресси палатаси спикери Майк Жонсон томонидан таклиф этилган Украина, Исроил ва Тайванга алоҳида янги ёрдам қонунларини қўллаб-қувватлади. Бу ҳақда Deutsche Welle хабар берди.
Мазкур қонун Киевга янги ёрдам пакети, хусусан, қарийб 61 миллиард доллар ажратиш, Украинага узоқ масофали ATACMS ракеталарини топшириш, шунингдек, қарз тизимига ўтишни назарда тутади.
“Исроил ва Украинани танқидий қўллаб-қувватлаш, Ғазодаги фаластинликларга инсонпарварлик ёрдами кўрсатиш, Ҳинд-Тинч океани минтақасида хавфсизлик ва барқарорликни мустаҳкамлашга қаратилган қонун ҳужжатлари пакетини қатъий қўллаб-қувватлайман”, — деди Байден Оқ уйга берган баёнотида.
Байден Исроил Эрон томонидан мисли кўрилмаган ҳужумларга дуч келаётганини, Украина эса Россия томонидан тинимсиз бомбардимон қилинаётганини, сўнгги бир ой ичида уларнинг интенсивлиги кескин ошганини эслатди.
Байденнинг фикрича, Вакиллар палатаси қонун лойиҳаларини шу ҳафта қабул қилиши, Сенат эса “тезда шунга амал қилиши керак”.
“Мен зудлик билан ушбу қонунни имзолайман: биз дўстларимиз билан биргамиз ва Эрон ёки Россиянинг муваффақият қозонишига йўл қўймаймиз”, — деди АҚШ президенти.
Киевга янги ёрдам 60,8 миллиард долларни ташкил этиб, шундан 13,8 миллиарди қурол ва техника сотиб олишга, 13,4 миллиарди Украинага берилган қуролларни алмаштириш ва таъмирлашга йўналтирилади. Ушбу маблағнинг 23,2 миллиард доллари Америка қуроллари захираларини тўлдириш учун топширилади.
Исроилга ёрдам бериш учун 26 миллиард доллар, Тайванга эса 8 миллиард доллар ажратиш таклиф қилинмоқда.
20 апрель куни республикачилар вакиллар палатасида Украина, Исроил ва Тайванга янги ёрдам кўрсатиш бўйича овоз бериш режалаштирилган. Ҳар бир қонун лойиҳаси алоҳида овозга қўйилади.
Изоҳ (0)