Asli yamanlik bo‘lgan Hindiston milliarderi Mukesh Ambani hozirda 66 yoshda bo‘lib, uning umumiy boyligi 117 milliard dollarni tashkil etadi. U dunyoning eng badavlat tadbirkorlari reytingida 9-o‘rinni egallaydi.
Bahorning ilk kunlarida o‘g‘lining nikoh to‘yidan oldin uyushtirgan bir necha kunlik bazm tufayli Ambanilar oilasi katta shov-shuvlarga sabab bo‘lgan edi. Ambanilar oilasi hozirda eng qimmatbaho uylar reytingida ikkinchi o‘rinni egallagan Antiliya nomli ko‘p qavatli noyob uyda istiqomat qiladi.
Binoning balandligi 173 metr bo‘lib, 27 qavatdan iborat. Antiliya taxminan 37 000 m/kv maydonga ega, bu Reyxstagdan (13 290 m/kv) deyarli uch baravar katta demakdir. Minora shaklidagi saroy Hindistonning Mumbay shahridagi Altamount ko‘chasida joylashgan. Saroyda Mukesh va uning rafiqasi, milliarderning onasi Kokilaben Ambani, shuningdek, juftlikning uch farzandi — egizak o‘g‘illari Anant va Akash, hamda qizi Isha oilasi bilan yashaydi.
Bino 2006—2010-yillarda chikagolik arxitektorlar Perkins&Will loyihasi bo‘yicha qurilgan. Ma’lum bo‘lishicha, milliarderning rafiqasi 60 yoshli Nita Ambani Nyu-Yorkdagi Mandarin Oriental mehmonxonasida qolganda Markaziy bog‘ni ko‘rib noodatiy uy qurish g‘oyasini o‘ylab topgan.
Uy 8 balli zilzilaga bardosh bera oladi. Bino fen-shuy ta’limotiga asoslanib, asosan kvadrat shakldagi dizaynda qurilgan. Shuningdek, Ambani turar joy majmuasi fasadi salqinlikni ta’minlash uchun o‘simliklar bilan qoplangan.
Bino ichida bir necha qavatli bog‘lar bo‘lib, ular yashash xonalari va mashinalar turargohini bir-biridan ajratib turadi. Mazkur turargohda milliarderlarning 170 dan ortiq qimmatbaho brend ostidagi mashinalari mavjud. Masalan, pushti Rolls-Royce Phantom mashinasi Nita Ambaniga tegishli.
Olti qavatdan iborat mashinalar garajida turli eksklyuziv superkarlarni uchratish mumkin: Mercedes-Maybach S600 Guard, BMW 760Li, Ferrari 812 Superfast, Bentley Bentayga, Lamborghini Urus, Maserati Levante va Rolls-Royce.
Vestibyulda turar joylarga va garajga olib boradigan to‘qqizta lift ishlaydi, ulardan ikki nafari xizmatchilar uchun mo‘ljallangan.
Milliarder rafiqasi Nita Ambani uchun alohida raqs studiyasi, kafe va muzqaymoq zali, ibodatxona, spa-markaz, yoga zali va hatto qordan iborat maxsus xona bor!
Qorli xona Hindistonning jaziramasini unutishga yordam beradi.
Ambani oilasi uchun 600 ga yaqin xodim xizmat qiladi va Hindistondagi o‘rtacha oylikdan yuqoriroq maosh oladi. Misol uchun, Indian Times gazetasi ma’lumotlariga ko‘ra, shaxsiy oshpaz oyiga taxminan 200 000 hind rupisi oladi, bu 2400 dollarga teng. Taqqoslash uchun, Hindistonda o‘rtacha ish haqi oyiga taxminan 400 dollarni tashkil qiladi.
Binoning xarajatlari oyiga o‘rtacha 30 ming dollarni talab etadi.
Izoh (0)