Britaniyalik kino va teatr aktyori Deniel Redkliff “Garri Potter” franshizasining dastlabki uchta qismini suratga olish vaqtida Severus Sneyp rolini ijro etgan aktyor Alan Rikmandan juda qo‘rqqani haqida Happy Sad Confused podkastida so‘zlab berdi.
Shuningdek, aktyor bolaligida hamkasbi undan qattiq nafratlanishiga amin edi.
Alan Rikman meni roli va ovozi bilan juda qo‘rqitar edi. Uning ovoz tembri shunchalik past ediki, aytgan so‘zlari ichimda aks-sado bergandek bo‘lardi, — deydi Daniel.
Podkast boshlovchisi Redkliffga Alan Rikmanning o‘limidan biroz avval yozib olingan intervyusidan parcha ko‘rsatdi. Unda marhum aktyor yosh hamkasblari haqida iliq fikrlar bildirgan edi. Rikmanning qayd etishicha, u Denielning Brodveyda muvaffaqiyat qozongani uchun yosh hamkasbidan mag‘rurlangan:
Men Nyu Yorkdagi kafelardan birida Deniel bilan uchrashishga muvaffaq bo‘ldim. U ham teatrda o‘ynash uchun shaharga kelgan edi. “Hech narsa bajarmay qanday qilib biznesda muvaffaqiyatga erishish mumkin” nomli myuziklda Deniel ajoyib rol ijro etdi. Aytish joizki, hamkasbim nyu yorklik mutaxassislardan yaxshiroq raqsga tushdi. Demak, u o‘z ustida juda ko‘p ishlagan, — degan edi Rikman.
Alan Rikman umrining so‘nggi kunlariga qadar hamkasbi ishtirok etgan spektakllarni doimiy tomosha qilib borgan va Deniel bilan sahnalarni tez-tez muhokama qilib turgan.
Eslatib o‘tamiz, aktyor Alan Rikman 69 yoshida saraton xastaligidan vafot etdi. Rikmanning “Chaqilmas yong‘oq” filmidagi terrorchi Hans Gruber, “Robin Gud: qaroqchilar shahzodasi” filmidagi Nottingem sherifi rollari ancha mashhur. Yosh avlod vakillari Alan Rikmanni asosan “Garri Potter” franshizasidagi Severus Sneyp roli orqali taniydi.
Izoh (0)