Turk seriallarining syujeti, aktyorlar mahorati har qanday tomoshabin e’tiborini o‘ziga qaratadi. Ulardagi voqealar rivoji, haqiqiydek tasvirlangan tuyg‘ular, munosabatlar ham alohida e’tirofga loyiq. Turkiya davlati hozirga kelib AQSHdan keyingi eng ko‘p serial sotuvchi ikkinchi mamlakatga aylangan. Ammo ko‘pgina turk yulduzlarining kelib chiqishi to‘liq turk millatiga mansub emas. Balki shuning uchun seriallardagi barcha qahramonlar noyob go‘zallik sohibidir?
Meryem Uzerli
Xurram obrazi bilan tanilgan latofatli Meryem Uzerli 1983-yil 12-avgustda Germaniyaning Kassel shahrida tug‘ilgan. Uning onasi Ursula nemis, otasi Husayn esa turk. U oiladagi to‘rtinchi va kenja farzand. Farzandida san’atga bo‘lgan qiziqishni ko‘rgan onasi Meryemni teatr to‘garagiga olib bordi. So‘ng u Gamburgdagi Frese drama studiyasida aktyorlik yo‘nalishida tahsil oldi, u yerda kichik teatr spektakllarida ham rol o‘ynadi. 2008-yildan u epizodik rollar bilan nemis filmlari va teleseriallarida suratga tusha boshladi.
Fahriye Evjen
Aktrisa 1986-yil 4-iyunda tug‘ilgan. Ota-onasi Hadiche va Ramazan Evjen Germaniyaning g‘arbida joylashgan Zollingen shahrida yashagan. Onasi — cherkas, otasi esa Saloniki shahridan qochgan turk muhojiri edi. Kavkaz va turk genlari Fahriye go‘zalligida namoyon bo‘lgani tufayli u Istanbuldagi kinosanoati vakillari e’tiboriga tasodifan tushgan. Keyinchalik u “To‘kilgan yaproqlar”, “Kurt Seyit va Aleksandra”, “Choliqushi” va “Sevgi senga o‘xshaydi” loyihalarida suratga tushgan.
Alina Boz
Turk kinosanoatida kurtak ochayotgan yosh aktrisa Alina Boz Moskva shahrida tug‘ilgan. Uning onasi rus, otasi turk. 7 yoshigacha Rossiyada yashagan va keyinchalik oilasi bilan Istanbulga ko‘chib kelgan. Aktrisa rus va turk tillarida ravon so‘zlashadi. Bolaligida u uchuvchi bo‘lishni istagan va aviatsiya mutaxassisligiga o‘qishga kirgan. Kunlarning birida go‘zal Alinani moda vakillari uchratib qoladi va unga turli takliflar kelib tushadi va shu tariqa u kinosanoatiga ham kirib keladi.
Yasemin Allen
Kelib chiqishi britaniyalik bo‘lgan turk aktrisasi “Muhtasham yuz yil” serialida Defne sulton rolini o‘ynagan. Uning otasi ingliz, onasi esa turk. Yasemin kino va televideniye fakultetida tahsil olgan.
Chag‘atoy Ulusoy
“Ichkarida” serialidagi roli bilan o‘zbek muxlislariga yaxshi tanish bo‘lgan Chag‘atoy Ulusoyning otasi bolgariyalik, onasi esa bosniyalik.
Kivanch Tatlitug‘
“Taqiqlangan sevgi”, “Kurt Seyit va Aleksandra” va “Taqiqlangan sevgi” teleseriallari yulduzi Kivanchni turkiyalik Bred Pitt deb ham atashadi. U Kosovo albanlarining ko‘p farzandli oilasida dunyoga kelgan. U bolaligidan basketbolga qiziqar, aktyor bo‘lishni xayoliga ham keltirmagan edi. Ammo sportda jiddiy jarohat olgani tufayli basketbolni tashlashga majbur bo‘lgan va modellikka ishga kirgan.
Filiz Ahmet
“Muhtasham yuz yil” serialidagi Nigor xalfa Makedoniyada tug‘ilgan, bolaligi ham shu yerda o‘tgan. Ba’zi manbalar aktrisani albaniyalik yoki bosniyalik deb ta’riflashadi. Otasi esa turk bo‘lgan. Ota tomondan bobosi teatr aktyori bo‘lgan.
Aydan Shener
“Choliqushi” serialining qahramoni Aydan Shener 1963-yilda Turkiyada tug‘ilgan. 18 yoshida u “Turkiya go‘zali” tanlovida qatnashib, g‘olib bo‘lgan. Uning ota-onasi aslida qozonlik bo‘lishgan.
Selma Ergech
Xadicha sulton obrazi Selmaga jahon miqyosida mashhurlik keltirdi. U 1978-yilda Germaniyada tug‘ilgan. Otasi turk, onasi nemis millatiga mansub.
Tuba Buyukustun
Go‘zal, aqlli va iste’dodli aktrisa Tuba Buyukustunning otasi grek, onasi esa qrim-tatar millatiga mansub. Hozirda aktrisa ajrimdan so‘ng ikki farzandini yolg‘iz tarbiya qilmoqda.
Neslihan Atagul
Yashil ko‘zli maftunkor Neslihan 1992-yilda Istanbulda tug‘ilgan va 8 yoshida kelajakda albatta aktrisa bo‘lishni maqsad qilgan. Neslihanning otasi Yashan Sener (Turkiyaga ko‘chib kelgach ismini o‘zgartirgan bo‘lishi mumkin) kelib chiqishi cherkas, onasi esa rus hamda belarus millatiga mansub. Oila SSSR hududida yashagan, keyinchalik mamlakat parchalanib ketgach, Turkiyaga ko‘chib kelgan.
O‘smirligidan Neslihan aktyorlikka juda qiziqqan va uning tanlovini ota-onasi va akasi Ilkay Atagul doim qo‘llab-quvvatlagan. Natijada Neslihan 13 yoshida kinosanoati va shou-biznesga kirib kelgan.
Izoh (0)