Turkiya xavfsizlik xizmati 16-aprel kuni mamlakatdan chiqib ketishni rejalashtirgan 2 nafar terrorchini qo‘lga oldi. Bu haqda Anadolu nashri xabar berdi.
Manbada aytilishicha, terrorchilar uzoq vaqt davomida noqonuniy yo‘llar bilan Gretsiyaga chiqib ketishni rejalashtirib kelgan. Mamlakatda davom etayotgan faol aksilterror operatsiyalar xorijiy terrorchilik tashkilotlari taʼsiriga tushib qolgan fuqarolarda chuqur tashvish uyg‘otgan.
Turkiya Milliy mudofaa vazirligi xabariga ko‘ra, qo‘lga olinganlar “Kurdiston ishchi partiyasi”ga aloqador bo‘lgan. Ularning shaxsi aniqlanib, tergov idorasiga topshirilgan.
Turkiya rasmiylari dastavval 4 kishi hibsga olinganini xabar qilgan. Ularning barchasi terrorchilikda gumonlanib so‘roq qilingan. Buning oqibatida esa ularning faqat ikki nafari terrorchi guruh aʼzosi ekani yuzaga chiqqan.
“Terrorizmga qarshi kurashimiz chegaralarimizda faol davom etmoqda”, — deyilgan Turkiya Milliy mudofaa vazirligi xabarida.
Izoh (0)