Saudiya Arabistoni tashqi ishlar vaziri Faysal ibn Farxon Ol Saud Isroil va Eron hukumatlarini vazmin bo‘lishga, keskinlikni kuchaytirmaslikka chaqirdi. Bu haqda Al Jazeera nashri xabar berdi.
Manbada aytilishicha, Faysal ibn Farxon Ol Saud eskalatsiyadan tiyilish hamma uchun ustuvor vazifa bo‘lishi kerakligini taʼkidlagan. Aks holda, Yaqin Sharq navbatdagi mojaroni ko‘tara olmasligi mumkin.
Saudiya rasmiysi, shuningdek, G‘azoda o‘t ochishni to‘xtatish chaqirig‘ini yana bir bor takrorlagan. Anklavda o‘t ochishni to‘xtatish bo‘yicha xalqaro saʼy-harakatlar mutlaqo yetarli emasligini maʼlum qilgan.
“Biz G‘azo xalqining azob-uqubatlariga barham berish uchun ko‘proq harakat qilishimiz lozim. Bu urush tugashi kerak”, — degan Saudiya Arabistoni tashqi ishlar vaziri Faysal ibn Farxon Ol Saud.
Saudiya Arabistoni Eron havo hujumi ortidan Isroilga nota yo‘llab, tinchlik muzokaralarini tezlashtirishga chaqirgan ikkinchi mamlakatdir. Bundan oldin Xitoy rasmiylari Tel-Aviv bilan bog‘lanib, ulardan G‘azo va Eronga nisbatan dushmanlik kayfiyatidan voz kechishni hamda sulhga erishishni so‘ragan edi.
Izoh (0)