Turkiya harbiylari Iroq shimolida 16 nafar terrorchini yo‘q qildi

Turkiya qurolli kuchlari Iroq shimolida harbiy amaliyot o‘tkazib, 16 nafar xavfli terrorchini yo‘q qildi. Bu haqda Anadolu nashri xabar berdi.

Turkiya Milliy mudofaa vazirligi maʼlumot berishicha, 15-aprel kuni Anqara kuchlari Iroq shimolidagi qator nuqtalarga hujumlar uyushtirgan. Kurdiston ishchi partiyasi terrorchilari yashiringan nishonlar yo‘q qilingan.

“Operatsiyalarimiz oxirgi terrorchi zararsizlantirilgunga qadar davom etadi”, — deyilgan Milliy mudofaa vazirligi rasmiylari eʼlon qilgan bayonotda.

Hujumlar, asosan, Hakurk va Asos mintaqalarida amalga oshirilgan. Havo kuchlari ketma-ket hujumlar tashkil etgan.

Maʼlumot o‘rnida, Kurdiston ishchi partiyasi Turkiyada rasman terroristik tashkilot deb eʼlon qilingan. Turkiyaga qarshi 40 yildan beri davom etgan terror kampaniyasida partiya 40 000 nafardan ortiq tinch aholi vakillari o‘limiga sabab bo‘lgan. AQSH va Yevropa Ittifoqi ham partiyani terrorchi guruhlar ro‘yxatiga qo‘shib, unga qarshi qurol-yarog‘ embargosi joriy qilgan.