22-aprel kuni Lyuksemburgda Yevropa Ittifoqi mamlakatlari mudofaa vazirlari ishtirokida Ukrainaga qurol yetkazib berish muhokama qilinadi, dedi Yevropa Ittifoqi diplomatiyasi rahbari Josep Borrelning matbuot kotibi Piter Stano.
“Biz Ukrainaning ehtiyojlaridan to‘liq xabardormiz va bu ehtiyojlarni aʼzo davlatlar yetkazib berishi mumkin bo‘lgan barcha narsalar bilan qondirishga harakat qilmoqdamiz. Bo’lajak tadbirda Yevropa Ittifoqiga aʼzo davlatlar Ukrainaga qanday yordamni qachon jo‘natishlari mumkinligini aniqlashtirib olishlari kerak bo‘ladi”, — dedi Stano.
Uning so‘zlariga ko‘ra, “aʼzo davlatlar Ukrainaga o‘zini himoya qilish uchun qo‘llaridan kelgancha yordam bermoqda”. Bu yordam ketma-ket uchinchi yil ko‘rsatilmoqda va bunday holat ilgari hech qachon kuzatilmagan.
Shu bilan birga, Stano Eronning Isroilga hujumi va Ukrainadagi voqealar o‘rtasida o‘xshashlik izlamaslikka chaqirdi.
Yevropa Ittifoqi Kengashi veb-saytining xabar berishicha, tashqi ishlar vazirlari 22-aprel kuni Ukraina tashqi ishlar vaziri Dmitriy Kuleba va mudofaa vaziri Rustem Umerov bilan videokonferensiya orqali norasmiy fikr almashganidan keyin Ukrainadagi vaziyatni muhokama qiladi.
“Keyingi munozara Yevropa Ittifoqi tashqi ishlar va mudofaa vazirlari ishtirokida qo‘shma yig‘ilishda bo‘lib o‘tadi”, — deyiladi xabarda.
Izoh (0)