Germaniya Eronga qarshi sanksiyalarni kengaytirishga chaqirdi

Germaniya tashqi ishlar vaziri Annalena Berbok Isroilga hujum munosabati bilan Eronga qarshi qo‘shimcha sanksiyalar joriy etishga chaqirdi. Bu haqda tegishli manbalarga tayanib, Deutsche Welle xabar berdi.

Germaniya TIV rahbarining taʼkidlashicha, Yevropa Ittifoqi allaqachon Tehronga Rossiyaga dronlar yetkazib bergani uchun sanksiyalar kiritgan, jazo choralarini kengaytirish uchun faol harakat qilmoqda.

“Biz Eronning harakatlari qanchalik xavfli ekanini ko‘ryapmiz”, — dedi Berbok Eronning Isroilga hujumini izohlar ekan.

Avvalroq Yevropa Ittifoqi diplomatiyasi rahbari Jozep Borrel Eronning Isroilga hujumi munosabati bilan Yevropa Ittifoqi davlatlarini favqulodda yig‘ilishga chaqirgan edi. U 16-aprel kuni bo‘lib o‘tishi rejalashtirilgan.

“Yevropa Ittifoqi Eronning dronlar va raketalar yordamida Isroilga qilgan hujumlarini keskin qoralaydi. Bu misli ko‘rilmagan eskalatsiya va mintaqaviy xavfsizlikka tahdid”, —  deya ta’kidlagan Borrel.

U barcha tomonlarni “maksimal vazminlik”ka chaqirgan. G‘arb davlatlari ham Eronning harakatlarini qoralagan.

Germaniya kansleri Olaf Shols asossiz hujum bilan Eron mintaqaviy urushni qo‘zg‘atish xavfini tug‘dirganini ta’kidlagan va Germaniya Isroil bilan qat’iy turishiga ishontirgan.