Eronning 14-aprelga o‘tar kechasi uyushtirgan havo hujumi Isroilga “urush e’lon qilish”dir. Bu haqda mamlakat prezidenti Isaak Gersogga tayanib, The Times of Israel xabar berdi.
Uning ta’kidlashicha, Isroil hozirda hujumga javob berishning “barcha variantlarini ko‘rib chiqmoqda”, lekin urush qidirmayapti.
“Hozirda biz o‘zimizni tiyganimiz, oqibatlarini bilganimiz va buni hamkorlarimiz bilan muhokama qilayotganimiz uchun barcha variantlarni ko‘rib chiqmoqdamiz va xalqimizni himoya qilish uchun zarur choralarni ko‘rishimizga to‘liq ishonaman. Biz urush qidirmayapmiz”, — deb ta’kidladi Gersog.
Isroil prezidenti Eronning hujumi Tehron “butun dunyo bo‘ylab tartibsizlik, terror va beqarorlikni qanday tarqatayotganiga” yana bir misol bo‘lishini da’vo qildi.
“Dunyo Tehrondagi yovuz imperiyaga qarshi turish va Eron rejimiga buni e’tibordan chetda qoldira olmasligini tushuntirish vaqti keldi”, — dedi u.
Eronning Isroilga hujumi va sabab
14-aprel kuni Eron tunda 300 dan ortiq dron, qanotli raketalar va ballistik raketalar bilan Isroilga hujum qildi. Bunga Isroilning Damashqdagi Eron konsulligiga 1-aprel kuni bergan aviazarbasi sabab bo‘ldi. Hujum oqibatida 11 kishi, jumladan, 2016-yilgacha Livan va Suriyadagi “Quds” elita kuchlariga rahbarlik qilgan Eron harbiy maslahatchisi general Muhammad Rizo Zohidiy, uning o‘rinbosari general Muhammad Hodi Hoji Rahimiy va yana besh eronlik zobit ham halok bo‘lgandi. Shuningdek, uch nafar Suriya va bir nafar Livan fuqarosi vafot etgan.
Holat yuzasidan AQSH razvedkasi Isroilni Eron tomonidan qasos hujumi bo‘lishidan ogohlantirdi, Bayden Isroilni doim qo‘llab-quvvatlashini bildirib, Eronni hujum qilmaslikka chaqirdi. Bunga javoban Eron agar amerikalik harbiylar Isroil tomonda ularga qarshi jang qilsa, nishonga olinishlaridan ogohlantirdi. O‘z navbatida, AQSH harbiylari hafta oxirida Eron va Yamandan Isroilga uchirilgan 80 dan ortiq dronni urib tushirdi. Ular orasida kamida olti ballistik raketa ham bo‘lgani ma’lum qilindi.
Isroil armiyasining da’vo qilishicha, 14-aprel kuni mamlakatga yaqinlashayotgan raketa va dronlarning 99 foizi Arrow uzoq masofali raketaga qarshi mudofaa tizimi va qiruvchi samolyotlar tomonidan yo‘q qilingan. Eron harbiy shtab-kvartirasi hujumni “muvaffaqiyatliroq” deb atadi va javob hujumi bo‘lgan taqdirda “kattaroq kuch bilan” zarba berishni va’da qildi.
Izoh (0)