Rossiyadan 23 nafar turkmanistonlik chiqarib yuborildi — OAV

Rossiyadan 23 nafar Turkmaniston fuqarosi deportatsiya qilindi. Bu haqda Turkmen.news xabar berdi.

Ularning sakkiz nafari Domodedovodagi mikrorayonda ishlagan, jumladan, onlayn xizmat ko‘rsatish do‘konlaridan birining omborida ishlab, yotoqxonasida yashagan. 25-mart kuni ular Crocus City Hall’dagi teraktdan keyin o‘tkazilgan reydlar chog‘ida qo‘lga olingan. Keyinchalik deportatsiya qilingan.

Ayni paytda ommaviy axborot vositalari Rossiyada migratsiya siyosatining turli darajada kuchayayotgani haqida yozmoqda. Xususan, qonun loyihasi tayyorlangan, unga ko‘ra xorijliklar Rossiya operatorlaridan SIM kartalarni faqat biometrik ma’lumotlardan foydalangan holda va Davlat xizmatlari portalida ro‘yxatdan o‘tgan taqdirda sotib olishlari mumkin.

“Ayni paytda Turkmanistonning ayrim viloyatlarida ketish uchun hujjatlarni rasmiylashtirayotgan mehnat muhojirlariga Rossiyaga chipta sotish to‘xtatilgan”, — deyiladi xabarda.

Rossiyada noqonuniy muhojirlarga qarshi reydlar Crocus City Hall’da uyushtirilgan teraktda Tojikiston fuqarolari ayblanayotgandan keyin kuchaygan. So‘nggi maʼlumotlarga ko‘ra, Crocus’dagi teraktda 145 kishi halok bo‘lgan, 550 dan ortiq kishi jarohatlangan, javobgarlikni ISHID terrorchilik tashkiloti o‘z zimmasiga olgan.

ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.