“Aeroflot” kompaniyasi uchuvchilari Sheremetyevo aeroportiga qo‘nayotganda noto‘g‘ri yo‘lakka chiqib ketdi, deb yozdi “Aviatorshina” Telegram kanali.
Unga ko‘ra, aeroportda uchta uchish-qo‘nish yo‘lagidan ikkitasi ishlagan, qo‘nishlar o‘ng tomonda, parvoz esa markaziy qismdan amalga oshirilgan. Samolyot esa o‘ng tomondagi emas, markazdagi yo‘lakka qo‘ngan.
Telegram kanal xabariga ko‘ra, voqea 10-aprel, chorshanba kuni Saratovdan Moskvaga uchayotgan samolyot bilan sodir bo‘lgan. Airbus A320 samolyoti qo‘nish uchun pastlay boshlaganida, dispetcher uchuvchilar bilan aloqa o‘rnatadi va qaysi yo‘lakka qo‘nish bo‘yicha ko‘rsatmalar beradi.
Biroz vaqt o‘tgach, u ekipajga kursdan biroz og‘ish haqida xabar bergan. Uchuvchilar bu ma’lumotni tasdiqlagan va uchish-qo‘nish yo‘lagini ko‘rayotganini ma’lum qilgan.
Shundan so‘ng, dispetcher uchuvchilarning manyovr qilishini kutgan holda to‘g‘ri uchish-qo‘nish yo‘lagiga qo‘nishga ruxsat bergan, biroq havo layneri og‘ish yo‘nalishi bo‘yicha parvozni davom ettirgan.
Dispetcher samolyot boshqa yo‘lakka qo‘nishini tushunib, zudlik bilan uchishga tayyorgarlik ko‘rayotgan barcha samolyotlarni to‘xtatgan. Natijada sodir bo‘lishi mumkin bo‘lgan katta fojianing oldi olindi.
Izoh (0)