Rossiya sohasi bo‘yicha ishlamaydigan migrantlarni mamlakatdan chiqarib yubormoqchi

Rossiyada o‘z ixtisosligi bo‘yicha ishlamagan migrantlardan mamlakatni tark etish talab qilinishi mumkin. Bu haqda “Izvestiya” xabar berdi.

Rossiya Mehnat vazirligi tegishli qonun loyihasi tayyorlanayotganini ma’lum qildi. Hujjat hukumatning strategik majlisi yakunlari bo‘yicha tayyorlangan bo‘lib, ish beruvchilarning migrantlarni tanlashini rag‘batlantirishga va ustuvor ishga qabul qilish konsepsiyasini mustahkamlashga qaratilgan.

“Qonun loyihasida chet el fuqarosining Rossiyada vaqtinchalik ishlash huquqini tasdiqlovchi maxsus hujjat yaratish nazarda tutilgan. Amalda mazkur ruxsatnoma hujjatiga muvofiq migrant ma’lum bir ish beruvchida ishlashini anglatadi. Shuningdek, ular uchun avans to‘lovlari to‘g‘ridan to‘g‘ri xorijlik mutaxassisni yollagan kompaniya tomonidan amalga oshiriladi”, — deydi Mehnat vazirligi matbuot xizmati.

Ta’kidlanishicha, bu migrant Rossiyaga kelganida, masalan, uni yollash xarajatlari, jumladan, aviachiptalar narxini o‘z zimmasiga olgan qurilish kompaniyasida ishlashdan bosh tortishi va ish joyini kuryerlik xizmatiga almashtirish holatlarini bartaraf etadi.

“Bundan tashqari, agar bunday xodim tashkiliy ishga qabul qilish ishtirokchisi bo‘lmagan boshqa korxonada ishlash istagini bildirsa, u 15 kun ichida Rossiya hududini tark etishi kerak”, — deya aniqlik kiritdi vazirlik.