Vyetnamlik ko‘chmas mulk magnati Chiong Mi Lan 11-aprel kuni Xoshimin shahar sudi tomonidan mamlakat tarixidagi eng yirik moliyaviy firibgarlik ishi bo‘yicha o‘limga hukm qilindi. Bu haqda BBC xabar berdi.
67 yoshli Van Thinh Phat kompaniyasi rahbari Chiong Mi Lan moliyaviy jinoyatlar uchun Vyetnamda o‘limga hukm qilingan kam sonli ayollardan biridir. Firibgarlikning ko‘lami ham misli ko‘rilmagan. U tijorat bankidan 304 trillion dong (taxminan 12,5 milliard dollar) kredit olganlikda aybdor deb topilgan.
Biroq uning harakatlaridan ko‘rilgan jami zarar 27 milliard dollarga baholanmoqda va sud hukmi uni aynan shu summani qaytarishga majbur qilmoqda, garchi ayblov buning iloji yo‘q deb hisoblasa ham.
Taxminlarga ko‘ra, sud ayolga bosim o‘tkazish va hech bo‘lmaganda o‘g‘irlangan mulkning bir qismini qaytarishga majburlash uchun uni o‘limga hukm qilgan. Milliarder aybini tan olmagan va aybni qo‘l ostidagilarga yuklagan. Lanning oila a’zolaridan biri Reuters agentligiga u hukm ustidan shikoyat qilishni rejalashtirayotganini aytdi.
Chiong Mi Lan 2012-yildan 2022-yilgacha Saygon tijorat bankini (SCB) o‘nlab soxta odamlar orqali boshqarib, mablag‘larni minglab “arvoh kompaniyalar” orqali o‘tkazib, hukumat amaldorlariga pora bergan, — deydi mahalliy OAV.
Prokuratura ma’lumotlariga ko‘ra, 2018-yil boshidan 2022-yil oktyabrigacha hukumat SCBga moliyaviy yordam ko‘rsatayotganda, Lan katta miqdordagi mablag‘ni o‘zlashtirgan va bir vaqtning o‘zida shirkatlarga noqonuniy kreditlar bergan.
Lanning 2022-yil oktyabr oyida hibsga olinishi Vyetnamda korrupsiyaga qarshi davom etayotgan kurashdagi eng shov-shuvli voqealardan biri bo‘ldi.
“Yonayotgan o‘choq” deb nomlangan kampaniya Vyetnam siyosatining eng yuqori qatlamlariga ta’sir ko‘rsatdi, yuzlab yuqori martabali hukumat amaldorlari va biznes rahbarlariga impichment e’lon qilindi yoki iste’foga chiqishga majbur bo‘ldi. O‘tgan noyabr oyida Vyetnam Kommunistik partiyasi bosh kotibi Nguen Fu Chong “korrupsiyaga qarshi kurash uzoq muddatda davom etishini e’lon qilgandi.
Izoh (0)