Saul Avalres—Hayme Mungiya qarama-qarshiligi bo‘lib o‘tadigan oqshomning asosiy kard janglari ma’lum bo‘ldi

O‘zbekiston vaqti bilan 5-may tongida AQSHning Nevada shtati Las-Vegas shahrida navbatdagi professional boks kechasi bo‘lib o‘tadi. 

Oqshomning markaziy jangi ikkinchi o‘rta vazn (76,2 kg) toifasida mutlaq jahon chempioni, meksikalik Saul Alvares (60-2-2, 39 KO) hamda uning mag‘lubiyat nimaligini bilmay kelayotgan vatandoshi Hayme Mungiya (43-0, 34 KO) o‘rtasida kechadi. Tashkilotchilar ushbu turnirning pullik translyasiya qilanadigan janglar ro‘yxatini oshkor etdi. 

Tabiiyki, ro‘yxatning birinchi pog‘onasida meksikaliklar o‘rtasidagi markaziy jang turibdi. Ikkinchi o‘rinda yarim o‘rta vaznda (66,7 kg) vaqtinchalik WBC chempioni, amerikalik Mario Barrios (28-2, 18 KO) hamda argentinalik Fabian Maydana (22-2, 16 KO) jangi turibdi.

Oqshom doirasida yarim yengil vazn (57,2 kg) toifasida vaqtinchalik WBC chempioni, amerikalik Brendon Figeroa (24-1-1, 18 KO) vatandoshi, ikkinchi yengil vaznda sobiq jahon chempioni Jessi Magdalenoga (29-2, 18 KO) qarshi ringga ko‘tariladi.

Yarim o‘rta vazn (66,7 kg) toifasida WBA Regular chempioni, litvalik Eymantas Stanionis (14-0, 9 KO) ikki yillik tanaffusdan so‘ng ringga qaytmoqda. 2022-yilning aprel oyida hozircha so‘nggi jangini o‘tkazgan Eymantas 5-may tongida venesuelalik Gabriel Maestre (6-0-1, 5 KO) bilan to‘qnash keladi.

Aynan mana shu janglar Kanelo — Mungiya oqshomining pullik PPV-kardidan o‘rin oldi.