Toshkent shahri va viloyatida 2023—2024-yillarda Osiyo taraqqiyot banki hamkorligida 13 ta maktab quriladi. Bu haqda prezidentning 25-mayda imzolangan tegishli qarorida belgilandi.
Hujjatga ko‘ra, o‘quvchilarga sifatli ta’lim olishi uchun zarur shart-sharoitlarni yaratish maqsadida Toshkent shahrining Yangihayot tumanida (1 ta), Toshkent viloyatining Zangiota (5 ta), O‘rtachirchiq (2 ta), Qibray (3 ta), Toshkent (2 ta) tumanlarida davlat-xususiy sherikchilik asosida xalqaro standartlarga javob beradigan maktablar quriladi.
Buning natijasida 13 860 ta qo‘shimcha o‘quvchi o‘rni, 1 300 ta yangi ish o‘rinlari yaratiladi. Toshkent viloyatidan poytaxtga qatnab o‘qiydigan o‘quvchilar soni 20 foizga qisqaradi.
Qarorda belgilanishicha, Respublikaning boshqa hududlarida ham davlat-xususiy sherikchilik asosida maktablar tashkil etish choralari ko‘riladi.
18-may kuni Yevropa tiklanish va taraqqiyot banki bilan Namangan va Farg‘ona viloyatlarida 15 ta maktab qurib berish bo‘yicha kelishuvga erishilgandi.
Izoh (0)